सशस्त्र प्रहरी उपरीक्षक थपलियाको हृदयघातबाट निधन

वीरगन्ज- सशस्त्र प्रहरी बल नेपाल नम्बर १३ गण, पर्साका प्रमुख प्रहरी उपरीक्षक सुमन थपलियाको आज दिउँसो निधन भएको छ । बाराको गढीमाईसम्म आज बिहान साइक्लिङ गरेर फर्किएका सशस्त्र प्रहरी उपरीक्षक थपलियाको दिउँसो १ः०० बजेतिर हृदयघातबाट निधन भएको पर्साका प्रमुख जिल्ला अधिकारी हिरालाल रेग्मीले जानकारी दिए ।

साइक्लिङबाट फर्किएपछि उनी गणस्थित आफ्नै कोठामा आराम गरिरहेका बेला अचानक बेहोस भएका थिए । बेहोस भएका उनलाई उपचारका लागि वीरगन्जस्थित नेपाल मेडिसिटी वयोधा अस्पताल लगिएकामा अस्पताल पुर्याउनुअघि नै मृत्यु भइसकेको चिकित्सकले घोषणा गरेको प्रजिअ रेग्मीले बताए ।

---

उनको आजै शव परीक्षण गराई हेलिकोप्टरबाट शव काठमाडौँ पठाउने तयारी भएको प्रजिअ रेग्मीले बताए । नुवाकोट स्थायी घर भएका थपलियाको परिवारजन काठमाडौँमा बस्दै आएको छ । उनी सात महिनाअघि सशस्त्र प्रहरी बल नेपाल नम्बर १३ गण हेडक्वार्टरको प्रमुखको जिम्मेवारीमा आएका थिए । रासस