मोटरसाइकल दुर्घटना हुँदा सुर्खेतमा एकको मृत्यु

सुर्खेत। मोटरसाईकल दुर्घटना हुदाँ सुर्खेतको वीरेन्द्रनगरमा एकको मृत्यु भएको छ । दुर्घटनामा परि सुर्खेतको वीरेन्द्रनगर नगरपालिका – १२ का ४१ बर्षका धर्मदत्त सापकोटाको ज्यान गएको छ ।  दुर्घटनामा परि  गम्भीर घाइते भएका सापकोटाको उपचारका क्रममा ज्यान गएको प्रहरीले जनाएको छ ।

धुलियाबिटबाट बजार तर्फ आउदै गरेको भे ७ प ७७४६ नम्बरको मोटरसाईकल पिपिरा चोकमा दुर्घटना भएको  जिल्ला प्रहरी कार्यालय सुर्खेतले जनाएको छ । पिपिरा चोकमा रोकेर राखेको कर्णाली प्रदेश ०२०० प ४००४ नम्बरको स्कुटरलाई ठक्कर दिदा मोटरसाईकल चालक सापकोटा  गम्भीर घाइते भएका थिए । टाउको र छातीमा चोट लागेका उनलाई उपचारको लागि कर्णाली प्रदेश अस्पताल कालागाँउ सुर्खेतमा लगिएको थियो । उपचारकै क्रममा उनको ज्यान गएको जिल्ला प्रहरी कार्यालय सुर्खेतका डिएसपि लक्ष्मणबहादुर शाहीले जानकारी दिए ।

---