बाख्रा चराउन गएकी महिलाको चट्याङ लागेर मृत्यु

सुर्खेत- जाजरकोटको बारेकोट गाउँपालिकाकी एक महिलाको चट्याङ लागेर मृत्यु भएको छ । बारेकोट गाउँपालिका वडा नम्बर ५ टोलखानाकी २६ वर्षीया रेवती सिंहको चट्याङ लागेर मृत्यु भएको हो ।

आज दिउँसो ४ बजे गोठालो गएका बेला चट्याङ लागेर सिंहको मृत्यु भएको बारेकोट गाउँपालिकाका उपाध्यक्ष नरबहादुर गिरीले जानकारी दिए । ‘आज दिउँसो घर नजिकै बाख्रा चराउन जानुभएको रहेछ सोही बेला चट्याङ लागेर मृत्यु भएको हो,’ उपाध्यक्ष गिरीले भने, ‘म पनि यही ठाउँमा आएको छु, अहिले मृतकको शव परिवारको जिम्मा लगाउने काम भइरहेको छ ।’

---

घटनाको विषयमा प्रहरीलाई पनि खबर गरेपछि अहिले प्रहरी पनि आइपुगेको गिरीले बताए ।