दाङमा खुकुरी प्रहारबाट एक महिलाको मृत्यु, दुई जना घाइते

बुटवल- दाङमा खुकुरी प्रहारबाट एक महिलाको मृत्यु भएको छ । घटनामा दुई जना घाइते भएका छन् । मृत्यु हुनेमा तुलसीपुर उपमहानगरपालिकाकी अन्दाजी ४३ वर्षीया रीता लामिछाने हुन् ।

शनिबार दिउँसो साढे २ बजे स्थानीय टेकबहादुर हमालको खुकुरी प्रहारबाट उनको मृत्यु भएको दाङ प्रहरीले जनाएको छ । आफ्नै घर अगाडि रहेका बेला लामिछानेमाथि खुकुरी प्रहार भएको र घटनास्थलमै मृत्यु भएको इलाका प्रहरी कार्यालय तुलसीपुरका प्रहरी निरीक्षक नवराज केसीले जानकारी दिए ।

---

त्यस्तै खुकुरी प्रहारबाट ४५ वर्षीय वीरबहादुर हमाल र ६५ वर्षीय कमलाकुमारी हमाल घाइते भएका छन् । उनीहरूको राप्ती प्रादेशिक अस्पताल तुलसीपुरमा उपचार भइरहेको प्रहरीले जनाएको छ ।

खुकुरी प्रहार गर्ने टेकबहादुरलाई प्रहरीले नियन्त्रणमा लिएको छ ।