सुर्खेतमा बालिकामाथि सामूहिक बलात्कार, चारजना पक्राउ

सुर्खेत- सुर्खेतमा बालिकामाथि सामूहिक बलात्कार आरोपमा चार जना पक्राउ परेका छन् । प्रहरीले शनिबार साँझ उनीहरूलाई पक्राउ गरेको हो ।

पक्राउ पर्नेहरूमध्ये एक जना १९ वर्ष र अन्य तीन जना १५ र १६ वर्षका रहेको जिल्ला प्रहरी कार्यालय सुर्खेतका डिएसपी लक्ष्मण शाहीले बताए ।

---

सुर्खेतको पश्चिम बाबियाचौरकी १३ वर्षीया बालिका नाचगान हेर्न गएको बेलामा बलात्कार भएको प्रहरीले जनाएको छ । प्रहरीमा दिएको बयानअनुसार उनी पनि नाचगान हेर्न गइन् । साँझ ९ बजेतिर पिसाब लागेपछि उनी नजिकैको सडकमा आइन् । त्यही गाउँका १९ वर्षीय एक युवाले उनको मुख छोप्दै समाते । उनले बलात्कार गर्न खोज्दा कराइन् । उनी भागेर त्यही नाचगान भएको ठाउँमा गइन् । त्यहाँ गाउँका १६ र १५ वर्षीय दुई किशोर थिए । उनीहरूले ‘एक छिन काम छ, बहिनी’ भन्दै घर पछाडि बोलाए । उनी गएलगत्तै बालिकाको मुख छोपेर हातखुट्टा समात्दै महेन्द्रको घरमा लगे । बेलुका ११ बजेतिर उनीहरूले बालिकालाई बलात्कार गरेर नाचगान भएकै ठाउँमा फर्किए ।

केही समय बालिका अचेत भइन् । होस खुलेपछि उनी नजिकै छिमेकीको गाई गोठको माथिल्लो तलामा गएर सुतिन् । त्यहाँ पनि तिम्रो घरबाट बोलाएका छन् भनेर जबरजस्ती बलात्कार भएको बालिकाले प्रहरीमा बयान दिएकी छिन् ।

यसरी राति ९ बजेदेखि दुई बजेसम्म फरक–फरक स्थानमा एकै रात तीन जनाबाट बलात्कृत र एक जनाबाट बलात्कारको प्रयास भएकी उनी शारीरिक र मानसिक रूपमा विक्षिप्त भइन् । बिहान पख मात्रै बालिकाका साथीहरूले घरमा भनेपछि आफूले थाहा पाएको उनकी आमाले बताइन् ।

उनका अनुसार बालिकालाई एक वर्षको उमेरदेखि नै कुपोषण लागेको थियो । पोषण पुन:स्थापना गृहमा ल्याएपछि उनलाई सुधार भएको थियो । बलात्कार आरोपमा पक्राउ परेका सबैले एकअर्कालाई राम्ररी चिन्ने र एउटै गाउँको भएका कारण बलात्कारको घटना योजनाबद्ध रूपमा गरेको प्रहरीको प्रारम्भिक अनुसन्धानमा उल्लेख छ ।