साझा प्रकाशनको पुस्तक प्रदर्शनीमा २० देखि ८० प्रतिशतसम्म छुट

काठमाडौँ - पठन संस्कृति विकासका लागि साझा प्रकाशनले आयोजना गरेको पुस्तक प्रदर्शनी २०८० मा पाठक वर्गले उल्लेख उपस्थिति जनाएका छन् । 

असोज ७ गतेदेखि ललितपुरको पुलचोक स्थित साझा प्रकाशनको प्राङ्गणमा सुरु भएको प्रदर्शनीमा पाठकहरू तानिएका हुन् । साझा प्रकाशनले पाठकका लागि प्रदर्शनीमा २० देखि ८० प्रतिशतसम्मको छुट दिएको छ । ७ गतेदेखि आजसम्म पाठकहरू उल्लेख्य उपस्थित भएको र अझै २२ गतेसम्ममा धेरै पाठकहरूले प्रदर्शनीमा उपस्थिति जनाउने अपेक्षा आफूहरुको रहेको साझा प्रकाशनका निमित्त महाप्रबन्धक भेषराज घिमिरेले बताए । उनले प्रदर्शनीमा यस पटक भैरवबहादुर थापाको अल्फा साइन्स (नाट्य व्याकरण) नयाँ पुस्तकका रुपमा रहेको र बाबुराम आचार्यले लेखेको पृथ्वीनारायण शाहको जीवनीलाई पुनः मुद्रण गरेर प्रदर्शनीमा राखिएको बताए । उनले प्रदर्शनी स्थललाई व्यवस्थित गर्दै लगेको र  ५ सय बढी विधाका पुस्तकहरू प्रदर्शनीमा राखिएको बताए । उनले पहिला आख्यानहरु धेरै बिक्री हुने गरेपनि अहिले पुराना र इतिहासको पुस्तकप्रति पाठकको रुची बढ्दै गएको बताए । उनले देशभर गरेर ४० लाखसम्मको पुस्तक बिक्री हुने अनुमान रहेको पनि बताए । 

---

उनले भने, ‘यहाँ दुई पुस्तक नयाँ छन् । एउटा भैरवबहादुर थापाको अल्फा साइन्स, नाट्य व्याकरण हो । बाबुराम आचार्यले लेख्नुभएको पृथ्वीनारायण शाहको जीवनी थियो । त्यसलाई पुनःमुद्रण गर्न सकेका थिएनौँ । अहिले पुनः मुद्रण गरेर राखेका छौँ । प्रदर्शनी स्थललाई व्यवस्थित गरेका छौँ । यहाँ ५ सय बढी विधाका पुस्तकहरू छन् । पहिला आख्यानहरू धेरै बिक्थे, अहिले पुराना र इतिहासको पुस्तकप्रति रुची बढेको छ । ४० लाखसम्मको पुस्तक बिक्री हुने अनुमान छ ।’

त्यस्तै प्रदर्शनीमा आएका शरद प्रधानले कतिपय पुस्तकहरू पुनः प्रकाशनमा ल्याउनुपर्ने माग गरे । उनले साहित्य र इतिहासलाई पाठ्यपुस्तकमा राखेर नपढाएको कारण विद्यार्थीहरूमा साहित्यप्रतिको चाहना घट्दै गएकोप्रति चिन्ता व्यक्त गरे । 

उनले भने, ‘सबै पुस्तक त यहाँ पाइँदैन तर पनि कतिपय पुस्तकहरू पुनः प्रकाशनमा आउनुपर्छ । प्रायः पुस्तकहरू उपलब्ध छ । साहित्यलाई र इतिहासलाई पाठ्य पुस्तकमा नपढाएको कारण पनि विद्यार्थीहरूमा साहित्यप्रतिको चाहना कम छ । विद्यालय तहमा नेपाली साहित्य पाठ्यपुस्तक बाहेकका पनि अध्ययन गराउनुपर्छ ।

साझा प्रकाशनले पुस्तक टिकाउन समस्या रहेको उल्लेख गर्दै पुराना पुस्तकहरू जोगाएर राख्न सक्नुपर्ने बताएको छ । पुराना पुस्तकहरूमा पाठकको चाहना बढेकाले पुराना पुस्तकहरू बचाएर राख्नुपर्ने कर्तव्य र जिम्मेवारी आफूहरूको भएको बताए ।