वीरगञ्जमा आफ्नै घरमा हत्या गरिएको अवस्थामा महिलाको शव फेला

वीरगञ्ज- धारिलो हतियार प्रहार गरेको अवस्थामा आज वीरगञ्जमा एक महिलाको शव फेला परेको छ । वीरगञ्ज महानगरपालिका–१ छपकैया बस्ने पुनम देवीको हत्या गरिएको अवस्थामा शव फेला परेको हो ।

पुनमको शव शुक्रबार आफ्नै घरमा फेला परेको र टाउकोमा धारिलो हतियार प्रहार गरिएको पर्साका प्रहरी उपरीक्षक कोमल शाहले बताए ।

---

घटनास्थल पुगेको प्रहरी टोलीले शव नियन्त्रणमा लिई पोष्टमार्टमका लागि नारायणी अस्पतालमा पठाएको छ । घटनाको सम्बन्धमा अनुसन्धान भइरहेको प्रहरीको भनाइ छ ।

घटनास्थलमा तालिम प्राप्त कुकुर पनि अनुसन्धानका लागि मगाइएको थियो । घरमा एक्लै बस्दै आएकी मृतकका श्रीमान् कामको शिलशिलामा र छोरा अध्ययनका लागि भारतमा बस्दै आएका छन् ।