सिन्धुपाल्चोकबाट एसईईमा उत्कृष्ट अंक प्राप्त गर्ने ५ जना पुरस्कृत

काठमाडौँ- सिन्धुपाल्चोक जिल्लाबाट गत वर्षको माध्यमिक शिक्षा परीक्षा (एसईई) मा उत्कृष्ट अंक प्राप्त गर्ने ५ जनालाई सम्मान गरिएको छ । शनिबार काठमाडौँमा एक कार्यक्रमबीच सिन्धु युएस वेलफेयर सोसाइटीले उनीहरूलाई सम्मान गरेको हो ।

विवेक श्रेष्ठ,आश्विन तामाङ, संस्कृति चालिसे, खुशी श्रेष्ठ, सजना बस्नेतलाई जनही २१ हजार रुपैयाँसहित सम्मान गरिएको छ । यसअघि सिन्धुपाल्चोक जिल्लामा अध्ययन गरेर  गत वर्ष माध्यमिक शिक्षा परीक्षामा सामेल भएर सर्वोत्कृष्ट नतिजा ल्याउन सफल एक छात्र र एक छात्रालाई जनही ५१ हजार रुपैयाँसहित सम्मान गरिएको थियो । संस्थाले यसअघि उत्कृष्ट नतिजा ल्याउने एक छात्र र छात्रालाई मात्र सम्मान गर्ने गरेको थियो ।

---

यस पटक छात्रतर्फ ३.९५ दुई जना र छात्रातर्फ ३.०९ तीन जनाले प्राप्त गरेका कारण पाँच जनालाई सम्मान गरिएको हो । यसले विद्यार्थीको लगनशीलतामा थप टेवा पुग्ने विश्वास गरिएको छ । हालसम्म संस्थाको पहलमा सिन्धुपाल्चोकका अतिविपन्न १९ बालबालिकालाई निजी विद्यालयमा निःशुल्क अध्ययन गर्ने व्यवस्था मिलाएको छ ।