मकवानपुरकाे मनहरीबाट ८ लाख नगद, लागूऔषध र माेटरसाइकलसहित ५ जना नियन्त्रणमा

मकवानपुर- मकवानपुर प्रहरीले मनहरीबाट ८ लाख रुपैयाँ, लागूऔषध र माेटरसाइकलसहित ५ जनालाई नियन्त्रणमा लिएकाे छ । असाेज २० गते शनिबार उनीहरूलाई नियन्त्रणमा लिएकाे प्रहरीले जनाएकाे छ ।

उक्त नगद र लागूऔषधसहित कैलाश गाउँपालिका–८ का ३१ वर्षीय विकास मोक्तान, ३५ वर्षीय रामबहादुर स्याङ्बो, मनहरी गाउँपालिका–४ रमनटार का ३० वर्षीय रामचन्द्र गोले, २० वर्षीय दलबहादुर मोक्तान र पर्सा जिल्लाको ठोरी गाउँपालिका–८ का ३२ वर्षीय जितबहादुर चापागाईलाई नियन्त्रणमा लिएकाे जिल्ला प्रहरी कार्यालय मकवानपुरले जनाएकाे छ ।

---

विशेष सूचनाको आधारमा इलाका प्रहरी कार्यालय मनहरीबाट खटिएकाे गस्तीले मकहरी ६ नयाँबस्तीस्थित कुमार मोक्तानको घर अगाडि बाटोमा रोकिरहेको प्रदेश ३–०३–००१ प ४५४१ नम्बरको मोटरसाइकललाई सुरक्षा जाँच गर्दा ३ वटा बोरा र कालो कपडाको झोलामा लागूऔषध फेला पारेको थियो ।

मोटरसाइकलबाट कोडिन फोस्पेट ओनरेक्स ६ सय २ बोतल, चरेस २० ग्राम र ८ लाख नगद फेला पारेको थियो । लागूऔषध, नगद र माेटरसाइकलसहित ५ जनालाई नियन्त्रणमा लिई अनुसन्धान गरिरहेको प्रहरीले जानकारी दिएको छ ।