मिठाई पसलबाट पैसा लुट्ने व्यक्ति पक्राउ

सुर्खेत- सुर्खेतमा मिठाई पसलबाट पैसा लुट्ने एक व्यक्तिलाई प्रहरीले पक्राउ गरेको छ । मिठाई पसलबाट पैसा लुटेको साढे तीन घण्टामा प्रहरीले उक्त व्यक्तिलाई पक्राउ गरेको हो ।

सगरमाथा मिठाई पसलबाट मिठाई किन्ने बहानामा ती व्यक्तिले मंगलबार पैसा लुटेका थिए । सगरमाथा मिठाई पसलका प्रोप्राइटर प्रेमबहादुर बडुवालले जिल्ला प्रहरी कार्यालय पुगेर घटनाको विषयमा जानकारी गराएपछि प्रहरीले सिसी क्यामेराको सहायताबाट पैसा लुट्ने व्यक्तिलाई पक्राउ गरेको हो । 

---

बडुवालले दिएको हुलिया भएको एक व्यक्ति मोटरसाइकलमा चढेर फरार भएको सिसी टिभी फुटेजमा देखिएपछि प्रहरीले ती व्यक्तिलाई पक्राउ गरेको जनाएको छ । पैसा चोरी भएको साढे तीन घण्टामै पिपिराबाट लुट्न प्रयोग भएको मोटरसाइकलसहित युवराज वलीलाई पक्राउ गरेको प्रहरीले जनाएको छ ।

सुब्बाकुना प्रहरी ईन्चाज पदम बलाएरले वलीलाई नियन्त्रणमा लिएर उनको साथबाट १८ हजार नगद फेला परेको जानकारी दिए । मिठाई पसलबाट लुटेको थैलो कहाँ राखेका छन् भन्ने बारेमा जिल्ला प्रहरी कार्यालयले थप अनुसन्धान थालेको छ ।