दसैँ अवधिभर धनुषामा ३७ जना पक्राउ

जनकपुरधाम- दसैँ अवधिभर धनुषामा चोरीसहित विभिन्न आपराधिक घटनामा संलग्न रहेकाे आराेपमा ३७ जनालाई पक्राउ गरिएको छ । 

जिल्ला प्रहरी कार्यालय धनुषाले आइतबार पत्रकार सम्मेलन गर्दै दसैँको घटस्थापनादेखि दशमीसम्म चोरी, लागूऔषध सेवन र शंकास्पद रूपमा हिँड्डुल गर्नेलगायतका ३७ जनालाई पक्राउ गरिएको जानकारी दिएका छन् ।

---

पत्रकार सम्मेलनमा धनुषाका एसपी विश्वराज खड्काले दसैँभरमा मोटरसाइकल र साइकल चोरी आरोपमा ४/४ जना, मोटर चोरीमा संलग्न २ जना, घरमा चोरी गर्ने आरोपमा ८ जना, घरको ताल्चा फुटाउने घटनामा संलग्न ४ जना लागूऔषध सेवन गर्ने ६ जनासहित मेलामा रातिको समयमा शंकास्पद रूपमा हिँड्डुल गर्ने ७ जना गरी ३७ जनालाई पक्राउ गरिएको बताए । 

उनले भने, ‘चोरीसहित विभिन्न आपराधिक घटनामा पक्राउ परेका मध्ये २७ जनालाई सम्झाई बुझाई आफन्तको जिम्मा लगाइएको र बाँकी १० जनाविरुद्ध थप अनुसन्धान भइरहेको र तिनीहरूविरुद्ध मुद्दा दर्ता गरी कारबाही प्रक्रिया अघि बढाइने छ ।’

यस्तै दसैँभरमा भन्सार छली गरी चोरी निकास गरिएका १५ लाख रुपैयाँभन्दा बढीका मालसामान प्रहरीले बरामद गरेको छ । एसपी खड्काले जनाए अनुसार भन्सार छलेर चोरी निकासी गरी अवैध ल्याउँदै गरेको अवस्थामा १५ लाख ५७ हजार ७४० रुपैयाँ बराबरको चिनी, चामल, लत्ताकपडासहितका सामग्री बरामद गरिएको हो । बरामद गरिएका सामानहरू आवश्यक कारबाहीका लागि भन्सार कार्यालयमा पठाइएको छ ।

आम नागरिक शान्तिपूर्ण वातावरणमा सौहार्दपूर्ण तरिकाले दसैँ पर्व मनाउन पाउन र मेला व्यवस्थापन उद्देश्यले जिल्ला प्रहरी कार्यालय धनुषाले ट्राफिक प्रहरीसहित ६६८ जना प्रहरी परिचालन गरेको थियो । जिल्लाको ९५ स्थानमा आयोजना गरिएको मेलामा सुरक्षा योजना बनाई आवश्यक संख्यामा प्रहरी परिचालन गरिएको थियो भन्ने कुरा एसपी खड्काले बताए । 

उनले भने, ‘दसैँ मेला व्यवस्थापनका लागि विशेष सुरक्षा योजना अन्तर्गत मेला डियूटी चेक प्वाईन्ट, यात्रु सहायता कक्ष, क्यूआरटी, पैदल गस्ती, मोटरसाइकल गस्ती, ट्राफिक व्यवस्थापन, राजमार्गमा प्रहरी परिचालन गरिएको थियो ।’