बाँसको लाठी प्रहार गरेर युवककाे हत्या, एकजना पक्राउ

कैलाली- धनगढीमा एक युवकको हत्या भएको छ । धनगढी उपमहानगरपालिका वडा नम्बर १६ बेहडाबाबा विद्यालय क्षेत्रमा बाँसको लाठी प्रहार गरेर लालबहादुर थापाको हत्या भएको हो ।

जिल्ला प्रहरी कार्यालय कैलालीका प्रवक्ता प्रहरी नायब उपरीक्षक (डिएसपी) कुलदीप चन्दका अनुसार सोमबार दिउँसो मदिरा चोरीको आरोपमा स्थानीय व्यापारीसमेत रहेका कृष्ण सेट्टीले थापालाई बाँसको लाठी प्रहार गरेका थिए । बेहोस अवस्थामा फेला परेका उनलाई प्रहरीले घरसम्म पुर्‍याएको डिएसपी चन्दले बताए ।

---

उनको हत्या हुँदा पनि प्रहरीले बेवास्ता गरेको परिवारको आरोप छ । उनको हत्या भएपछि मंगलबार जिल्ला प्रहरी कार्यालय, कैलालीका प्रहरी नायव उपरीक्षक चन्दसहितको प्रहरी टोली घटनास्थल पुगेको थियो ।

सेट्टीले बाँसको लाठीले प्रहार गरेकाे स्वीकार गरेको डिएसपी चन्दले बताए । ३८ वर्षीय थापाले पसलबाट मदिरा चोरी गरेपछि दुई पटक बाँसको लाठीले प्रहार गरेको प्रहरी समक्ष कृष्ण सेट्टीले बयान दिएका छन् । 

घटनाको विषयमा थप अनुसन्धान भइरहेको छ । शव पोस्टमार्टमका लागि सेती प्रादेशिक अस्पताल धनगढी ल्याइएको छ भने सेट्टीलाई प्रहरीले नियन्त्रणमा लिएको छ ।