बेचबिखनको जोखिममा परेका एक हजारभन्दा बढीको उद्धार

सुदूरपश्चिम - मानव बेचबिखन तथा ओसारपसार विरुद्ध अभियान सञ्चालन गर्दै आएको शान्ति पुनस्थापना गृहले पछिल्लो वर्ष बेचिने जोखिममा परेका एक हजार चार सय ६३ महिला तथा बालबालिकालाई  उद्धार गरेको छ ।

 धनगढीमा मंगलबार आयोजित कार्यक्रममा सार्वजनिक गरिएको तथ्यांकअनुसार विभिन्न प्रलोभनमा परी बेचिने जोखिममा भारतसहित अन्य  मुलक पुगेका ८७ व्यक्तिलाई उद्धार गरेर ल्याइएको जानकारी दिइयो । 
 ती मध्ये कतिपयलाई बिदेशबाट र अन्य कतिपयलाई नेपाल—भारत सीमा नाकाबाट उद्धार गरिएको पुनस्थापना गृहका क्षेत्रीय संयोजक संजित सिंहले बताए । 

---

  “निरक्षर महिलालाई विभिन्न प्रलोभन दिएर ललाईफकाई भारतसहित विभिन्न मुलुकमा पुर्याउने घटना भइरहेका छन्”, उनले भने, “बेचिनेमा खासगरी एकल, निरक्षर र बेरोजगार महिला बढी छन् ।”

 विभिन्न प्रलोभन दिएर ललाईफकाई निरक्षर महिलालाई बेचबिखनको फन्दामा पार्नेमा गिरोह नै सक्रिय रहेको जानकारी दिइयो । 

सो अवधिमा प्रहरीको रोहवरमा एक हजार चार सय ४९ जनालाई सम्बन्धित परिवारमा हस्तान्तरण गर्नाका साथै २६ हजार नौ सय ८७ महिला तथा बालबालिकालाई परामर्श दिइएको बताइएको थियो  ।

 उक्त संस्थाको अध्ययनअनुसार फोन तथा इन्टरनेटको सहज पहुँच बढ्दा नेपालमा पछिल्ला वर्षमा मानव बेचबिखन अपराधका नयाँ घटनाहरु देखिन थालेका छन् । 

 इन्टरनेट, मोबाइल फोनलगायत सामाजिक सञ्जालको सहज पहुँचका कारण मानव बेचबिखन तथा ओसारपसार रोकथाममा अर्को चुनौती थपिएको संयोजक सिंहले बताए । 

कार्यक्रममा धनगढी उपमहानगरपालिकाकी उपप्रमुख कन्दकला रानाथारुले मानव बेचबिखन तथा ओसारपसार विरुद्ध उपमहानगरपालिकाले यस संस्थासँग सहकार्य गरेर अघि बढ्ने प्रतिवद्धता व्यक्त गरिन् । 

पुनस्र्थापना गृहका राष्ट्रिय उद्धार संयोजक भूमिराज भट्टराईले आगामी दिनमा स्थानीय तहसँग पनि हातेमालो गरी मानब बेचबिखन विरुद्धको अभियानलाई सक्रिय बनाइने बताए । 

विसं२०५०देखि काम गर्दै आएको सो संस्थाले विगतमा सिन्धुपलाञ्चोक, रसुवा, मकवानपुर ,चितवन, नवलपरासी, रुपन्देही, कपिलवस्तु, कैलाली र कञ्चनपुरमा मानव बेचबिखन तथा ओसार पसार रोकथाम सम्बन्धी कार्यक्रम सञ्चालन गर्नाका साथै सीमामा निगरानी, पैरवी, तथा जनचेतनामूलक कार्य गर्दै आएको छ ।

सो  क्रममा सरोकारवाला निकाय, संस्था र व्यवसायीसँगको समन्वय तथा सम्पर्क गरेर मानब बेचबिखन तथा ओसारपसारको कामलाई हतोत्साही पार्ने, भारतलगायत तेस्रो मुलुकमा मानव बेचबिखनमा परेकाहरुलाई उद्धार गरी नेपाल फिर्ता गर्न पहल गर्ने, उद्धार पश्चात् उनीहरुलाई  सुरक्षित आवास, सीपमूलक तालिम,कानुनी तथा मनोसामाजिक परामर्श सेवा प्रदान गरेर परिवार र समाजमा ससम्मान पुनस्र्थापना गर्ने जस्ता गतिविधि पनि गर्दै आएको जनाइएको थियो ।
रासस