बबईमा डुबेर एक किशोरको ज्यान गयो

बर्दिया- बबई नदीमा डुबेर एक युवकको मृत्यु भएको छ । जिल्ला प्रहरी कार्यालय, बर्दियाका सूचना अधिकारी एवं डीएसपी तुलसीराम अर्यालले बबईमा डुबेर मृत्यु हुनेमा गुलरिया-१० रत्नापुरका २४ वर्षीय साहिद अन्सारी भएको बताए ।

अन्सारी कसरी डुबे भन्ने प्रहरीले खुलाएको छैन । स्थानीयले भने तटबन्धका लागि तारजाली बुन्दै गरेका एक जनालाई भारतीय प्रहरीले पक्रन खोज्दा भाग्ने क्रममा बबई नदीमा डुबेर मृत्यु भएको आरोप लगाएका छन् ।

---

गुलरिया नगरपालिका-१० स्थित लटकनियामा बिहीबार अपरान्ह साढे ४ बजे भारतको लौकाहीबाट दुई वटा मोटरसाइकलमा सादा पोसाकका भारतीय प्रहरी प्रवेश गरेपछि डरले भाग्ने क्रममा २४ वर्षीय साहिद अन्सारीको मृत्यु भएको स्थानीयले दाबी गरे ।