कतार पठाइदिन्छु भन्दै ठगी गर्ने एक जना पक्राउ

काठमाडौँ- कतार पठाइदिन्छु भन्दै रकम ठगी गरेको आरोपमा एक जना पक्राउ परेका छन् । काठमाडौँको मनमैजु बस्ने मोरङको पथरी शनिश्चरे नगरपालिका–७ का ३३ वर्षीय भीमबहादुर तामाङलाई बिहीबार दिउँसो प्रहरीले पक्राउ गरेको हो ।

तामाङले एक महिलालाई वैदेशिक रोजगारका लागि कतार पठाई पार्लरमा मासिक ६० हजार रुपैयाँ तलबमा काम लगाइदिन्छु भन्दै प्रलोभनमा पारेका थिए । पटकपटक गरी एक लाख ८६ हजार रुपैयाँ लिई सम्पर्कविहीन भएका थिए ।

---

ठगी गरेकोले पक्राउ गरी उपस्थित गराउन वैदेशिक रोजगार विभागबाट पत्राचार भएपछि काठमाडौँ उपत्यका अपराध अनुसन्धान कार्यालय मीनभवनबाट खटिएको प्रहरीले उनलाई काठमाडौँ बसुन्धराबाट पक्राउ गरेको जनाइएको छ ।

उनलाई थप अनुसन्धान तथा कारबाहीका लागि वैदेशिक रोजगार विभाग ताहाचल काठमाडौँ पठाइएको छ।