नागरिक सुनुवाइमा प्रहरीकै गुनासोः मोबाइलमा टावर नै हुन्न

धुलिखेल - नागरिकको सुरक्षा र समाजमा शान्ति स्थापना कायम गर्न सञ्चारको भरपर्दो सुविधा नहुँदा सोचेजस्तो सेवा प्रदान गर्न नसकिएको  प्रहरीको गुनासो छ।

काभ्रेपलाञ्चोकको रोशी गाउँपालिका–११स्थित मङ्गलटारमा रहेको इलाका प्रहरी कार्यालयले आयोजना गरेको ‘नागरिक सुनुवाइ कार्यक्रम’मा इलाका प्रहरी कार्यालयका प्रमुख पञ्चलाल गोलेले रातिको समयमा कार्यालय भएको क्षेत्रमा मोबाइलको नेटवर्क नहुँदा नागरिकको समस्या र गुनासोलाई सम्बोधन गर्न कठिनाइ भएको गुनासो गरे । 

---

इलाका प्रहरी कार्यालय क्षेत्रमा नेपाल टेलिकम र एनसेलको सेवामा कमजोर भएका कारण नागरिकले दिनुपर्ने सूचना र प्रहरीबाट हुनुपर्ने शान्ति सुरक्षाको काममा प्रभावकारिता आउन  नसकेको उनको भनाइ थियो । 'दिउँसोको समयमा नेटवर्क आए पनि रातिको समयमा दुवै सञ्चारमाध्यमका नेटवर्कले काम गर्दैनन् ।' उनले भने, 'धेरै वर्ष अगाडिदेखिको यस क्षेत्रको समस्या भनेको सञ्चारको पहुँच प्रभावकारी नहुनु हो ।' 

पछिल्लो समयमा कार्यालय अनुगमनको क्रममा पुगेका प्रमुख जिल्ला अधिकारी र जिल्ला प्रहरी कार्यालय प्रमुखलाई सूचना र सञ्चारको क्षेत्रमा व्यहोर्नुपरेको समस्याबारे जानकारी गराउँदा उनीहरूले समाधान गर्न सम्बन्धित ठाउँमा पहल गर्ने आश्वासन दिएको प्रमुख गोलेले बताए ।  विशेषगरी रातिको समयमा हुने आपराधिक घटनाको सूचना बेलैमा प्राप्त हुन नसक्दा आपराधिक घटनामा संलग्न हुने व्यक्ति उम्कने गरेको उनको भनाइ थियो। भौगोलिक विकटता, जनशक्ति अभाव ठाउँ अनुसारको सवारीसाधन नहुनु र भएका सवारी साधन पनि थोरै हुँदा स्थानीय जनप्रतिनिधि, संघ÷संस्था र नागरिककै सहयोग लिनुपरेको प्रमुख गोलेको भनाइ थियो ।

पछिल्लो समय गाउँपालिकाको सहयोगमा मुख्य बजार क्षेत्रमा सिसिटिभि, जडान गरिएपछि घटनाको अनुसन्धानमा सहज भएको जनाइएको थियो। इलाका प्रहरी कार्यालयमा आर्थिक वर्ष २०८०/८१ को पहिलो चौमासिकमा ६६ वटा सवारी साधन दुर्घटना, दुई वटा जबर्जस्ती करणीको मुद्दा, एउटा आगलागीको घटना, तीन जना चोरी मुद्दा परेका र दुई वटा चोरीको मोटरसाइकल नियन्त्रणमा लिइएको त्यसबखत जनाइएको थियो । कार्यालयबाट सो अवधिभित्र २८ वटा स्थानमा जनचेतनामूलक कार्यक्रम सञ्चालन र आठ ठाउँमा  सिसिटिभि जडान गरिएको जानकारी दिइयो ।

नागरिकले भने घटना भएको समयमा नै प्रहरीको उपस्थिति र सुरक्षाको व्यवस्था प्रभावकारी नभएको गुनासो गरेका थिए । कार्यक्रममा गाउँपालिकाका अध्यक्ष दिनेश लामाले विपदको बेलामा र शान्ति सुरक्षाको काममा प्रहरीको महत्वपूर्ण योगदान रहेको बताए । प्रहरीकै सहयोगमा जनप्रतिनिधि र कर्मचारी मिलेर नागरिकको सेवामा खट्नु परेकाले प्रहरीलाई पालिकाले सहयोग गर्दै आएको उनको भनाइ थियो । विकास निर्माण र प्रशासनिक क्षेत्रमा गर्नुपर्ने काममा पालिका लागिरहेको बताउँदै अध्यक्ष लामाले संवेदनशील स्थानमा सिसिटिभि जडान गरिएको र अन्य स्थानमा पनि क्रमशः थप्दै जाने जानकारी दिए । 

रोशी गाउँपालिकाका–११ को भिखोरी डाँडामा भएको नेपाल टेलिकमको टावरमा राष्ट्रिय विद्युतीकरणको लाइन विस्तार नभएका कारण सोलारमार्फत विद्युत सञ्चालन गरिएकाले रातिको समयमा नेटवर्कको  समस्या हुने गरेका कारण राष्ट्रिय प्रसारण लाईन जोड्ने प्रक्रियामा रहेको र विद्युत उपलब्ध भएपछि नेपाल टेलिकमको नेटवर्कको समस्या समाधान हुने र  बिपी राजमार्गमा पनि फ्रि वाइफाईको लागि इन्टरनेटको सुविधा पुर्याउन पहल भइरहेको बताइएको थियो  । कार्यक्रममा गाउँपालिका उपाध्यक्ष मीमबहादुर वाईबा, प्रमुख प्रशासकीय अधिकृत रामबहादुर तामाङ, गाउँपालिका प्रवक्ता वसन्तकुमार लामा, वडाध्यक्ष गाउँपालिकाका शाखा प्रमुख सञ्चाकर्मी र स्थानीयवासीको उपस्थिति थियो ।
रासस