कञ्चनपुरबाट एक बालिकाको उद्धार

कञ्चनपुर- कञ्चनपुरमा लुकाएर राखेकी एक बालिकाको उद्धार गरिएको छ । भीमदत्त नगरपालिका-१० जिमुवाबाट करिब १५ वर्षीया बालिकाको उद्धार गरिएको हो ।

माइती नेपाल कञ्चनपुरले भारतको उत्तराखण्डकी बालिकाको उद्धार गरेको हो । एक हप्ताअघि घरबाट बेपत्ता भएकी ती बालिकाका आफ्न्तले खोजी कार्य गर्दा पनि फेला नपरेपछि प्रहरी र विभिन्न संघसंस्थामा निवेदन दिएका थिए । भारतीय प्रहरी र संघ-संस्थाले खोजतलासका लागि माइती नेपाल कञ्चनपुरलाई आग्रह गरेका थिए ।

---

माइती नेपाल कञ्चनपुरले आफ्नो नेटवर्क मार्फत शंकास्पद क्षेत्रबाट सूचना संकलन र प्रमाणीकरण गरेपछि जिल्ला प्रहरी कार्यालयसँगको समन्वय र सहकार्यमा भीमदत्त नगरपालिका-१० जिमुवाको एक जना टमाटा थरका व्यक्तिको घरमा छापा हानेर बालिकाको सकुशल उद्धार गरिएको हो ।

ती बालिकालाई पिथौरागढको एक होटलमा काम गर्ने लक्ष्मण टमाटाले ललाईफकाई जिमुवा बस्ने आफ्नो ठूलो बुवाको घरमा लुकाएर राखेका थिए । उद्धारपछि बालिकालाई पारिवारिक पुनर्मिलनका लागि मानव बेचबिखन तथा ओसारपसारविरुद्ध कार्यरत भारतीय संस्था रिड्सको जिम्मा लगाएको माइती नेपाल कञ्चनपुरकी संयोजक महेश्वरी भट्टले बताइन् ।