लोकतन्त्रपछि गाउँ रित्तिदै गएको भन्दै राष्ट्रपतिद्वारा चिन्ता व्यक्त

काठमाडौँ - राष्ट्रपति रामचन्द्र पौडेलले लोकतन्त्रपछि गाउँ–गाउँमा शिक्षा, सञ्चार, सडक, स्वास्थ्य र विद्युत्तीकरणको विकास भएपनि गाउँ रित्तिँदै गएकोमा चिन्ता व्यक्त गरेका छन् । 

सरस्वती बहुमुखी क्याम्पसको ६५ औं वार्षिकोत्सवलाई मंगलबार सम्बोधन गर्दै राष्ट्रपति पौडेलले लोकतन्त्रपछि मुलुकको शिक्षा, सञ्चार, सडक, स्वास्थ्य र विद्युत्तीकरणको क्षेत्रमा भएको विकासका बाबजुद त्यसको उपभोग गर्ने मानिसको अभावमा आज गाउँ रित्तिँदै गएको भन्दै चिन्ता व्यक्त गरेका हुन् । 

---

उनले नीति निर्माण र शासनसत्तामा बस्नेलगायत सबैले यस समस्याको समाधान खोज्नुपर्ने बताए ।  शिक्षा र रोजगारीका लागि दैनिक रुपमा हजारौं नेपाली युवाहरू विदेशिने क्रम रोक्ने गरी रोजगारी र सीप मूलक शिक्षा दिन जरुरी रहेकामा उनले जोड दिए । कुनै पनि देशको शिक्षा त्यस देशको सामाजिक, आर्थिक अवस्था र देशको आवश्यकता अनुरूप निर्धारण हुनुपर्नेमा जोड दिँदै राष्ट्रपति पौडेलले बदलिँदो परिस्थितिमा देश विकासमा टेवा पुर्याउने र विश्व बजारमा पनि प्रतिस्पर्धी हुनसक्ने शिक्षा नीति र कार्यक्रम आजको आवश्यकता रहेको बताए । 

राष्ट्रपति पौडेलले धेरै शैक्षिक उन्नति र प्रगतिका बाबजुद पनि सरस्वती क्याम्पसको भौतिक संरचना खास गरी अत्याधुनिक भवनलगायतको अभाव हुनु चिन्ताको विषय भएको भन्दै भौतिक पूर्वाधारलगायतमा सहयोग गर्न सरकारलाई आग्रह समेत गरे ।