बैतडीमा बँदेलको आक्रमणबाट दुई जना घाइते

बैतडी- बैतडीको मेलौली नगरपालिका-२ सलेनामा बँदेलको आक्रमणबाट दुई जना घाइते भएका छन् । घाइते हुनेमा सलेनाका अन्दाजी ३२ वर्षीय ओम प्रकाश जोशी र सोही वडाको  घाङलका मने दयालकी ९ वर्षीया छोरी करिस्मा दयाल रहेका छन् । 

आइतबार ३ बजेतिर घरमै बसिरहेका जोशीमाथि बँदेलले आक्रमण गरी घाइते बनाएको हो । ९ वर्षीया बालिकालाई पनि साँझ ५ बजेतिर घर नजिकै घाइते बनाएको स्थानीयले बताएका छन् ।

---

बालिकाको टाउकोमा गम्भीर चोट लागेको छ भने जोशीको खुट्टामा गम्भीर चोट लागेको छ । घाइते जोशी र दयाललाई सलेना स्वास्थ्य चौकीमा सामान्य उपचारपछि डडेलधुरा रेफर गरिएको छ ।  

यही पुष ११ गते पनि सोही वडाका रामबहादुर चन्खदलाई पनि बँदेलको बथानले आक्रमण गरी घाइते बनाएको थियो । दिनदाहाडै बँदेलले मानिसमाथि आक्रमण गर्न थालेपछि स्थानीयहरू त्रसित बनेका छन् ।