विवाह गरेको दुई महिना नबित्दै श्रीमतीको हत्या, श्रीमान् पक्राउ

सल्यान- विवाह गरेको दुई महिना नबित्दै श्रीमतीको हत्या गरेको आरोपमा प्रहरीले एक जनालाई पक्राउ गरेको छ । छत्रेस्वरी गाउँपालिका-५, लेखपोखराको ढाकुडाँडाकी अन्दाजी २० वर्षीया श्रीमती सीमा कवरको हत्या गरेको आरोपमा श्रीमान् २२ वर्षीय मोहन पुनलाई प्रहरीले पक्राउ गरेको हो ।

पुनले गत मंसिर १० गते मात्र सीमालाई भगाएर बिहे गरेका थिए । तर, सोमबार दिउँसो उनको घरभित्रै सीमाको शव फेला परेको थियो ।

---

स्थानीयले खबर गरेपछि घटनास्थल पुगेको प्रहरीले शंकास्पद देखिएपछि श्रीमान् मोहनलाई पक्राउ गरेर अनुसन्धान थालेको जिल्ला प्रहरी कार्यालयका प्रहरी निरीक्षक भवानीप्रसाद धमलाले जानकारी दिए । प्रहरीका अनुसार मृतक युवतीको शरीरमा निलडाम छन् । उनको नाम सीमा कवर भनिए पनि अहिलेसम्म बास्तबिक नाम समेत खुलेको छैन ।

वडाध्यक्ष फौदबहादुर बस्नेतले भने आइतबार राति कुटपिट गरेर मोहनले श्रीमतीको घरमै हत्या गरेको देखिएको बताए ।

प्रहरीले सोधपुछ गर्दा मोहनले प्रारम्भिक बयानमा आफूले श्रीमतीकाे हत्या गरेको स्वीकार गरेका छन् । घटनाबारे थप अनुसन्धान भइरहेको प्रहरीले जनाएको छ ।