काठमाडौँ प्रेस चौतारीद्वारा पशुपति परिसरमा सरसफाइ

काठमाडौँ- काठमाडौँ प्रैस चौतारीले स्थापना दिवसको अवसरमा पशुपति मन्दिर परिसरमा सरसफाइ कार्यक्रम गरेको छ । काठमाडौँ प्रेस चौतारीले नेपाल प्रेस चौतारीको २६ औँ स्थापना दिवसको अवसरमा पशुपति मन्दिर परिसर सरसफाइ गरेको हो ।

नेकपा एमाले काठमाडौँ महानगरपालिकाका इन्चार्ज तथा पूर्वमन्त्री रामेश्वर फुयालले प्रेस चौतारीले नेपालको क्रान्तिमा खेलेको भूमिका अद्वितीय रहेको बताए । उनले भने, ‘नेपालमा तीन वटा क्रान्ति भए । यसले समुन्नत नागरिक र मुलुक निर्माणका लागि आधार बनेको छ । यसकै आधारमा संघीय लोकतान्त्रिक गणतन्त्रात्मक शासन पद्धति कार्यान्वयनमा छ । यद्यपि मुलुक र जनताका लागि गर्नुपर्ने का धेरै बाँकी छन् ।’

---

मुलुक परिवर्तनका लागि राजनैतिक कर्मले मात्रै नपुग्ने बताउँदै उनले आर्थिक, सामाजिक, सांस्कृतिक रूपान्तरणमार्फत् जनताको अपेक्षअनुसार समाज निर्माण गर्न प्रेस स्वतन्त्रता दर्बिलो अंग भएको जिकिर गरे ।

यस्तै, काठमाडौँ प्रेस चौतारीका सचिव लक्ष्मण शर्माले आगामी दिनमा रचनात्मक कार्यक्रमलाई निरन्तरता दिने बताए ।

कार्यक्रममा नेकपा एमाले काठमाडौँ महानगरपालिकाका इन्चार्ज तथा पूर्वमन्त्री रामेश्वर फुयाल, जनप्रतिनिधि तथा काठमाडौँ महानगरको उपसचिव सिर्जना भेटुवाल, काठमाडौँ महानगर कमिटी सचिवालय सदस्य तथा वडा नम्बर ७ का इन्चार्ज कृष्णमणि भट्टराई र पशुपति विकास कोषका पूर्वसञ्चालक सदस्य आशा पाण्डेलगायतको उपस्थिति थियो ।

यस्तै,  प्रगतिशील तथा श्रमजीवी पत्रकारहरूको साझा संगठन प्रेस चौतारी नेपालले आफ्नो २६औं स्थापना आज दिवस देशभर मनाउँदै छ ।

अध्यक्ष गणेश बस्नेतका अनुसार २६औं स्थापना दिवसको अवसरमा केन्द्रीय कार्यालयले काठमाडौँमा विशेष कार्यक्रमको आयोजना गरिएको छ ।