भोजपुरमा १२ हजार बालबालिकालाई दादुरा-रुबेला खोप लगाइँदै

टक्सार (भोजपुर)- सरकारले आगामी फागुन महिनादेखि देशभर दादुरा-रुबेलाविरुद्धको खोप अभियान सञ्चालन गर्ने निर्णय गरेसँगै पहाडी जिल्ला भोजपुरमा पनि अभियान सफलतापूर्वक सम्पन्न गर्न आवश्यक तयारी थालिएको छ । 

भोजपुरमा आगामी फागुन २४ देखि २८ गतेसम्म खोप अभियान सञ्चालन हुने गरी तयारी थालिएको स्वास्थ्य कार्यालय भोजपुरले जनाएको छ । कार्यालयले अभियानबारे सरोकारवाला निकायसँग छलफल गरेको छ । जिल्ला समन्वय प्रमुख तथा जिल्ला खोप समन्वय समितिका अध्यक्ष कमल थुलुङ राईको अध्यक्षता भएको कार्यक्रममा खोप अधिकृत भरत भण्डारीले अभियानबारे जानकारी दिएका थिए । 

---

सरकारले २०२६ सम्म दादुरा-रुबेला निवारण गर्ने लक्ष्य लिएको खोप अधिकृत भण्डारीले बताए । उनले भने, 'बालबालिकालाई पूर्ण खोप नलगाउँदा बेलाबेलामा दादुरा-रुबेला महामारीका रूपमा देखा पर्दै आएकाले लक्ष्य हासिल गर्न चुनौती थपिएको छ ।' भोजपुरमा छ महिनादेखि १५ वर्षमुनिका १२ हजार ६० जना  बालबालिकालाई खोप लगाउने लक्ष्य रहेको उनले जानकारी दिए ।    

दादुरा-रुबेला सङ्क्रमणको जोखिमलाई मध्यनजर गर्दै आगामी फागुन १३ देखि चैत ७ गतेसम्म करिब ५७ लाख बालबालिकालाई खोप लगाउने सरकारको लक्ष्य छ ।  दादुरा-रुबेला सबैभन्दा बढी सङ्क्रामक रोग भएको तथा यो रोग लागेका एक बिरामीले १८ जनासम्मलाई सार्न सक्ने बताइएको छ । रासस