चौतारीमा तीन मेयर

जनआवाज बुझ्न र जनसमुदायको उपस्थितिमा सामूहिक निर्णय गर्नका लागि परापूर्वकालदेखि नै चौतारीको विशेष महत्व रहँदै आएको छ । अझ राजनीतिकर्मीका लागि त यस्तो मञ्चको सान्दर्भिकता अझै बढी हुन्छ । पछिल्लो समय स्थानीयस्तरमा हुने छलफल खुम्चिरहेका बेला, बुढानीलकण्ठ सांस्कृतिक-साहित्यिक महोत्सव-२०८० को दोस्रो दिन, बुढानीलकण्ठ, गोकर्णेश्वर र टोखा नगरपालिकाका मेयर चौतारीको महत्वबारे बोल्न एउटै मञ्चमा देखिए । 

बुढानीलकण्ठका मीठाराम अधिकारी, टोखाका प्रकाश अधिकारी र गोकर्णेश्वरका दिपककुमार रिसालले चौतारीको सामाजिक सांस्कृतिक महत्वमा केन्द्रित रही आफ्नो धारणा राखेका थिए । मिठाराम भन्छन्, ‘आज स्थानीय तह आफैंमा एउटा चौतारी भएको छ । छलफल गर्ने थलो पनि । नागरिकको सम्पूर्ण जिज्ञासा बोकेर हामी अघि बढिरहेका छौं । साहित्यिक-सांस्कृतिक छलफलमा स्थानीय नागरिकको उपस्थिति होस् भन्नका लागि नै हामीले यो महोत्सवको आयोजना गरेका हौं । आगामी दिनमा पनि यसरी छलफल हुने वातावरण बनाउनका लागि हामी लागिरहने छौं ।’  

---

दिपकले भने आफ्नो क्षेत्रका प्रसिद्ध साहित्यकार रमेश विकलको सम्झना गर्दै भने, ‘पहिलो आरुबारीको चापाबोटमा रमेश विकलले साथीहरूसँग बसेर कला साहित्यको कुराकानी गर्नु हुन्थ्यो । अझै पनि त्यो परम्परा यथावत् रहोस् भन्नका लागि आफ्नो नगरमा नियमितजसो साहित्यिक गतिविधि गरिरहेका छौं ।’ 

समुदायको छलफलको थलो चौतारी जोगाउन आफू गम्भीर रहेको टोखाका मेयर प्रकाशले जानकारी दिए । उनले चौतारीको पहिले र अहिलेको महत्व दर्साउँदै भने, ‘पहिले राजनीतिक तथा प्रशासनिक इकाइ गठन नहुँदा चौतारी मान्छेहरूको भेटघाट गर्ने संगम स्थल थियो । त्यहाँ राजनीतिक तथा न्यायिक निर्णय गरिन्थ्यो । अहिलेको सन्दर्भमा स्थानीय तहको चौतारी नगरसभा हो । जहाँ हामीले विकासका आयामहरूलाई निरुपण गरिरहेका छौं । नागरिकको आवाजलाई नजिकबाट अनुसरण गरेर नगरसभामार्फत विकासका विभिन्न विषयवस्तुलाई पस्किरहेका छौं ।’ 

तीनै जना मेयरले सामाजिक, आर्थिक, सांस्कृतिक र धार्मिक विकासमा आफूहरू सजग रहेकोमा जोड दिए । भौतिक र मानवीय विकासलाई कसरी समन्वय गर्नु हुन्छ भन्ने सहजकर्ता विमल आचार्यको प्रश्नमा जवाफमा मेयरहरूले शिक्षा, स्वास्थ्य, खानेपानी तथा कला साहित्यका क्षेत्रमा नगरमा भइरहेको कामको फेहरिस्त प्रस्तुत गरेका थिए । 

कार्यक्रमको अन्तिम चरणमा स्थानीय नागरिकका लागि पनि प्रश्न सोध्न दिइएको थियो । ती प्रश्न विशेष गरी खानेपानी समस्या र शिवपुरी राष्ट्रिय निकुञ्ज तथा बफर जोनका कारण आफूले भोग्नु परेको हैरानीमा केन्द्रित थियो । 

तीनवटै नगरपालिका काठमाडौं उपत्यकामा हाइकिङका लागि प्रसिद्ध छन् । पर्यटन क्षेत्रको विकासको प्रचुर सम्भावना बोकेका नगरपालिका पनि हुन् यी । त्यस्तै शिवपुरी राष्ट्रिय निकुञ्ज काठमाडौं उपत्यकाको खानेपानीको भरपर्दो स्रोत हो । तीनै जना मेयरले स्थानीय बासिन्दाको सरोकारका लागि ध्यान दिँदै यसको संरक्षण आफ्नो   प्राथमिकतामा रहेको जोड दिए । 

सभाध्यक्ष सूर्यनाथ उपाध्यायले शेसन समापन गर्दै भने, ‘मेयरहरू जनतासँग नजिक हुनुपर्छ, मेयरलाई प्रश्न सोधिरहनु पर्छ । यस अर्थमा यस्तो कार्यक्रम झनै सान्दर्भिक छ ।’