युवतीको अश्लिल भिडियो खिच्‍ने सशस्त्रका डीएसपी केसी निलम्बन

काठमाडौँ- रेस्टुरेन्टमा खाजा खान गएको बेला युवतीको अश्लिल फोटो भिडियो खिच्ने सशस्त्र प्रहरीका नायव उपरीक्षक (डीएसपी) तुलसिंह केसी निलम्बनमा परेका छन् । निलम्बन गर्न सशस्त्र प्रहरी बल मुख्यालय हलचोकले गृह मन्त्रालयलाई सिफारिस गरेपछि उनी निलम्बित भएका हुन् ।

सशस्त्रको मुख्यालयले फागुन ६ गते गृहलाई केसी पक्राउ परेको व्यहोरासहित  पत्र पठाएको थियो । उक्त पत्र पठाएसँगै उनी निलम्बनमा परेका हुन्।

---

पोखरास्थित सशस्त्र प्रहरीको चार नम्बर बाहिनीमा कार्यरत केसीले काठमाडौँको स्वयम्भूस्थित न्यु इभन पोइन्ट रेस्टुरेन्टमा खाजा खान गएकी एक युवतीको भिडियो खिचेको आरोपमा पक्राउ परेका केसी एक साता बढीदेखि थुनामा छन् ।

ती युवतीको उजुरीको आधारमा केसीलाई फागुन ५ गते पक्राउ गरी प्रहरीवृत्त स्वयम्भू ल्याइएको हो । प्रहरीले उनीमाथि वैयक्तिक गोपनीयता सम्बन्ध ऐनअनुसार अनुसन्धान गरिरहेको छ। यस ऐनअनुसार वैयक्तिक अनुमतिबिना कसैको तस्बिर वा भिडियो खिच्न पाइँदैन।