गर्भ बसेपछि प्रेमी फरार, परिवारले अस्वीकार गरेपछि सुत्केरीको बेहाल

नेपालगञ्‍ज : २१ दिने सुत्केरी छोरी र नातिनीको स्वास्थ्यमा समस्या आएपछि डुडुवा गाउँपालिका- ५ डलैपुरकी हस्ती बराल समस्यामा छिन् । २१ दिन पहिला भेरी अञ्चल अस्पतालमा नातिनीलाई जन्म दिएकी उनकी छोरी आकृती बराल (नाम परिवर्तन) ले प्रयाप्त आहाराको अभावका कारण स्वास्थ्य समस्या देखिएको हो ।

उनलाई बेला बेला मुर्छा पर्ने र शरिर पुरै सुन्निने जस्ता समस्या देखिन थालेको छ । एउटै विद्यालयमा अध्ययन गर्ने साथीसँगको माया प्रेमको सम्बन्धबाट गर्भवती भएकी स्मृती बराल हाल १८ वर्ष पुगेकी छन् । गर्भवती भएको कुरा जानकारी पाएदेखि फरार रहेका उनका प्रेमी सन्तोष बलामी मगर हाल भारत गएका छन् ।

---

सन्तोषका परिवारले छोरा घर नभएको भन्दै अस्वीकार गरेपछि सुत्केरी अवस्थामा रहेकी आकृती अलपत्र परेकी छिन् । आमा हस्तीका अनुसार गाउँकै विद्यालयमा अध्ययन गर्ने दुवैबीच प्रेम सम्बन्ध रहेछ, सन्तोषले विवाह गर्ने बचन दिएर शारीरीक सम्बन्ध राखे । सम्बन्धपछि उनको गर्भमा सन्तोषको बच्चा बस्यो यो कुरा सन्तोषलाई जानकारी गराउँदा आवश्यक सल्लाह दिनुको साटो बहाना बनाएर उनी भागेका थिए ।

सुत्केरी हुनु पहिले सम्पर्क गर्दा तिहार मनाउन आउने जस्तो कुरा गरेका सन्तोष सुत्केरी भएपछि धेरै पटक मोबाइलमा सम्पर्क गर्न खोज्दा पनि सम्पर्कमा आएका छैनन् । शारीरीक अपांगता भएकी हस्ती ज्याला मजदुरी गरेर जेनतेन परिवार पाल्दै आइरहेकी थिइन । लकडाउनका कारण अहिले त्यो पनि बन्द छ । आर्थिक अभावको ठुलो मारमा परेकी हस्ती ११ वर्ष पहिले श्रीमानले छोरा, छोरीलाई हस्तीको काखमा छाडी कान्छी श्रीमती लिएर भारतमा छिरेका थिए । उनी अहिलेसम्म फर्केका छैनन् ।