चैते दसैँ मेला : खर्च जुटाउनै सकस

बागलुङ- चैते दसैँका अवसरमा बागलुङमा परापूर्वकालदेखि सञ्चालन हुँदै आएको ऐतिहासिक चैत्राष्टमी मेलाको तीव्रताका साथ तयारी भइरहेको छ । 

मेलाका लागि आयोजना गरिएका प्रतियोगिताको व्यवस्थापनदेखि मेला भर्न आउने अतिथि र दर्शकका लागि मञ्च तथा मैदानको व्यवस्थापनको काम भइरहेको हो । कालिका भगवती गुठी व्यवस्थापन समितिको आयोजनामा चैतको ३० गतेदेखि मेला सुरु हुनेछ ।

---

मेलाका लागि सबै तयारी अन्तिम चरणमा पुर्याएको आयोजक गुठीले खर्च व्यवस्थापन भने कठिन भएको बताएको छ । मेलामा रु ५५ लाख खर्च हुने समितिको अनुमान छ । मेला हेर्न टिकटको व्यवस्था नभएको र सरोकारवालाको सहयोग नपाउँदा आर्थिक व्यवस्थापन कठिन भएको गुठीका अध्यक्ष कुमार खड्काले बताए ।

मेलाका लागि गुठीले रु १५ लाख दिने गरेको छ । प्रायोजकबाट रु १५ लाख अपेक्षा गरेको समितिले सोहीअनुसार सहआयोजक तथा प्रायोजक नभेटेको हो । मेला स्थलमा व्यावसायिक प्रयोजनका लागि आउँदा व्यहोर्नुपर्ने झन्झटका कारण व्यवसायीबाट सोचेजस्तो सहयोग नपाएको खड्काले बताए । रमाइलो मेलाबाट रु १२ लाख, आर्थिक सहयोगबाट रु तीन लाख, मेला स्थलका स्टलबाट रु तीन लाख र दर्ता शुल्क रु दुई लाख सङ्कलन गर्ने लक्ष्य समितिको छ ।

मेलामा पुरुष भलिबल, लोकदोहोरी, छेलोलगायतका प्रतियोगिता आयोजना गरेको समितिले रु १९ लाख पुरस्कारमा मात्रै खर्च गर्नेछ । सोबाहेक प्रतियोगिताका निर्णायक र प्राविधिक तथा अन्य सामग्रीका लागि लाखौँ खर्च हुने अनुमान छ । कलाकार, प्रचारप्रसार, सुरक्षा टेन्ट, इन्धन र पानी बिजुलीसमेत गरेर रु ५५ लाख खर्च हुने खड्काले बताए । यी सबै शीर्षकका खर्च जुटाउन स्थानीय, प्रदेश र सङ्घीय सरकारले सहयोग नगरेको गुनासो उनले सुनाए ।

कला संस्कृति, स्थानीय उत्पादन, व्यापार धार्मिक पर्यटन प्रवर्द्धन गर्ने उद्देश्यका साथ मेलाको आयोजना गरिएको भए पनि सरकारको ध्यान नपुगेको खड्काको गुनासो थियो । बुधबार पत्रकार सम्मेलन गरेर खड्काले मेलाको तयारीबारे जानकारी गराए । पुरानो परम्परागत रूपमा लाग्ने मेलाको स्वरूप परिवर्तन भएकाले आन्तरिक पर्यटक तान्न मेला महोत्सवले महत्वपूर्ण भूमिका खेल्ने उनले बताए ।

खड्काले मेलाले कालिका भगवती मन्दिरको ऐतिहासिक धार्मिक एवं साँस्कृतिक गरिमालाई अभिवृद्धि गर्ने अपेक्षा लिइएको बताए । मेलामा घरेलु उत्पादनलाई विशेष प्राथमिकता दिइने उनले बताए । चैत्राष्टमी मेला सञ्चालन हुने भएपछि देशका विभिन्न स्थानसहित बागलुङ जिल्लाका विभिन्न ठाउँबाट डालो, नाम्लो, डोका, डाली, नाङ्लो, ठेकासहित घरेलु उत्पादन बिक्रीका लागि व्यापारी आइपुगेका छन् ।

मेलामा पाँच लाख आन्तरिक पर्यटक आउने अपेक्षा गरिएको छ । मेला वैशाख ६ गतेसम्म सञ्चालन हुनेछ ।