कवाडी कर तिर्ने सेवाग्राहीलाई हातपात गर्दा ललितपुरमा ठेकेदार पक्राउ

काठमाडौँ- ​ प्रहरीले निकासी कर उठाउने क्रममा हातपात गरेको आराेपमा ललितपुरबाट ठेकेदारसहित ४ जनालाई पक्राउ गरेको छ ।

प्रहरीले सोमबार ललितपुर महानगरभित्र कवाडीको ठेक्का लिएको इन्द्रेणी हार्डवेयर एन्ड सेनेटरी वेयर प्रालिका सञ्‍चालक रोशन चौधरी, गिर्वाण बिक्रम खत्री, प्रकाश बस्नेत र श्याम ठकुरीलाई नियन्त्रणमा लिएको हो । उनीहरूमाथि सानेपामा दुई जनालाई कुटपिट गरेको आरोप छ ।

---

सोमबार आरोपीहरूविरुद्ध अभद्र व्यवहार सम्बन्धी कसुरमा जिल्ला प्रशासन कार्यालयबाट ७ दिनको म्याद लिएर अनुसन्धान भइरहेको ललितपुरका एसपी नरेश सुवेदीले इकागजलाई जानकारी दिए ।

उनका अनुसार दोहोरो करको माग थियो । एउटा नगरपालिकामा तिरेपछि अर्को स्थानीय तहमा तिर्नु नपर्ने भन्दै विवाद भएको थियो । अर्को स्थानीय तहमा कर तिरेको रसिद देखाउँदा पनि कर संकलकले मानेनन् ।

सीसीटीभीको फुटेजहरू पनि संकलन भइरहेको, हातपात र विवाद भएको कुराहरू भएकाले अनुसन्धान गरिरहेकाे प्रहरीले जनाएको छ ।

दोहोरो कर तिर्न नपर्ने भन्दै पीडितले कर संकलकलाई भनेका थिए ।

महानगरपालिकाले गत २ फागुनदेखि लागू हुने गरी इन्द्रेणी हार्डवेयर एन्ड सेनेटरी वेयर प्रालिसँग वार्षिक १० करोड १८ लाखमा ठेक्का सम्झौता गरेको थियो । 

असार ०८२ सम्मका लागि ललितपुर महानगरपालिकाभित्र छिर्ने र बाहिरिने सवारीसाधनबाट कर उठाउन महानगरले सम्झौता गरेको छ ।

तर, सेवाग्राहीले सामान्य सामान ढुवानी गर्दा पनि कर तिर्नुपरेको भन्दै विरोध गर्दै आइरहेका छन् ।