अवैध नदीजन्य पदार्थ ओसारपसार गरिरहेका टिपर स्थानीयको नियन्त्रणमा

महोत्तरी - ​अवैधानिक रुपमा नदीजन्य  पदार्थ ओसारपसार गरिरहेका टिपरहरूलाई स्थानीयहरूले नै नियन्त्रणमा लिएर प्रहरीलाई जिम्मा लगाएका छन ।

महोत्तरीको बर्दिबास नगरपालिका स्थित निर्माणाधीन रेल्वे स्टेसनमा बुधबार विल र भिसिटिएस विना ओसारपसार गरिरहेका ५ वटा टिपरहरूलाई नियन्त्रणमा लिएर प्रहरीलाई जिम्मा लगाएका हुन ।

---

ना ६ ८०९६, ना १ क ५३२०, ना ६ ख ७५३६, ना १ क ७०६७, ना १ क ९५११ नम्बर प्लेटका टिपरहरूलाई रोकेर कागजपत्र माग्दा देखाउन नसकेपछि नियन्त्रणमा लिएर जिम्मा लगाएको स्थानीय निरज अधिकारीले जानकारी दिए ।

पक्राउ परेका टिपरहरूको विषयमा अनुसन्धान भइरहेको इलाका प्रशासन कार्यालय बर्दिबासले जनाएको छ । 'टिपरहरूको  कागजपत्र नभएको र मापदण्डविपरित ओसारपसार गरिरहेको पाइएको छ ।' इलाका प्रहरी कार्यालय प्रमुख रेवतीरमण पोखरेलले भने । 'आज छुट्टी भएको हुनाले नगरपालिकालाई जिम्मा लगाउन पाइएन ।'

उक्त नदीजन्य पदार्थ कहाँबाट उत्खनन् गरिएको भन्ने समेत खुल्न सकेको छैन । पछिल्लो समय नगर क्षेत्रमा अवैधानिक उत्खनन् भइरहेको वेला रेल्वेले समेत स्रोत नै पहिचान नगरी माल खरिद गर्नु गलत भएको भन्दै स्थानीयहरूले विरोध गरेका छन ।

स्रोत पहिचान विना नदीजन्य पदार्थ बिक्रीवितरण गर्न नपाइने व्यवस्था छ तर क्रसर व्यवसायीहरूले समेत स्टक प्रमाणीकरण नगरी निर्माणाधीन रेल्वे स्टेसनमा बेचिरहेको पाइएको छ । राजस्व छली गरेर खुलेआम नदीजन्य पदार्थ बिक्रीवितरण हुँदा पनि सरोकारवालाहरू मौन रहेको भन्दै स्थानीयहरूले खबरदारी गरेका हुन ।

पछिल्लो दुई दिनमा मात्र ७ वटा मालवाहक टिपरलाई नियन्त्रणमा लिएर प्रहरीले कारवाही प्रक्रिया अगाडि बढाएको छ ।