अवैध भारतीय मलखाद्यसहित ४ वटा मोटरसाइकल बरामद

रौतहट- रौतहटस्थित प्रहरी गस्ती टोलीले ४ वटा भारतीय नम्बरको मोटरसाइकलसहित २२ बोरा अवैध भारतीय मलखाद्य बरामद गरेको छ ।

जिल्ला प्रहरी कार्यालय र इलाका प्रहरी कार्यालय कटहरीयाबाट खटिएको गस्ती टोलीले कटहरीया नगरपालिका ९ स्थित भन्सार छली ल्याएको युरिया मलखाद्य २२ बोरासहित ४ थान मोटरसाइकल बरामद गरेको हो ।

---

विआर ३० एम ०८९६, विआर ०६ सिबी ३३५६ र विआर ०५ ए क्यू ८६०५ र विआर ३० डब्लु ७९७१ नम्बरको मोटरसाइकलमा लोडगरी लैजाँदै गरेको अवस्थामा प्रहरी टोलीलाई देखि लोड मोटरसाइकल छाडी मानिस फरार भएको जिल्ला प्रहरी प्रवक्ता डिएसपी एलिजा गिरीले बताएकी छिन् ।

४ थान मोटरसाइकल र मलखाद २२ बोरा गरी कुल ४ लाख १८ हजार,७०० रुपैयाँ मूल्याङ्कन गरी आवश्यक कारबाहीको लागि गौर भन्सार कार्यालयमा दाखिला गरिएको जिल्ला प्रहरी कार्यालय रौतहटको सूचनामा उल्लेख गरिएको छ ।