काठमाडौँ- पाटन उच्च अदालतको आदेशपछि काठमाडौँ महानगरपालिकाले वडा नम्बर २४ मा फुटपाथ बढाउन न्युरोडबाट सुरु गर्‍यो । लगत्तै फुटपाथ बढाउन महानगर पनि अदालतको आदेश लिएर सडकमा डोजर लिएर निस्कियो ।

अहिले भने फुटपाथको काम अगाडि बढ्न सकेको छैन । वडा नम्बर २२ मा भने मङ्सिर २ गतेसम्म फुटपाथ बढाउन नपाइने गरी महानगरले जनप्रतिनिधि र स्थानीयवासीसँग सम्झौता गरिसकेको छ ।

---

केही समयअघि महानगरले विस्तार गरेको फुटपाथ सडक विभागले पुरेपछि लगत्तै महानगर विभागविरुद्ध उच्च अदालत पाटन पुगेको थियो । जनप्रतिनिधि र स्थानीयको अवरोधका बाबजुद पनि महानगरले २४ नम्बर वडामा भने फुटपाथ अघि बढाउने तयारी गरिसकेको छ ।

फुटपाथ बनाउन ल्याइएका सामग्रीले सडक अवरोध गरेको भन्दै न्युरोडका व्यापारी तथा स्थानीयवासीले गुनासो गर्न थालेका छन् । फुटपाथ विस्तारका लागि ल्याइएका सामग्री, सडक कुनामा राखिएको डोजरले पसलमा आउने ग्राहकलाई समेत असहज हुने गरेको व्यापारीहरूको गुनासो छ । यस्तै फुटपाथ अलपत्र छाडिनाले न्युरोडको सौन्दर्यतामा समेत ह्रास आउन थालेको भन्दै उनीहरूले असन्तुष्टि जनाएका छन् ।

कामको गति सुस्त भएकाले फुटपाथ बनाउने जिम्मा पाएको ठेकेदार कम्पनीले नै महानगरलाई बेवास्ता गर्न थालेको जस्तो देखिन्छ । कम्पनीको बेवास्ताका कारण फुटपाथ तयार गर्न ल्याइएका सामग्री यत्रतत्र छरिएका छन् ।

कहिले विरोध र कहिले झगडाकै कारण न्युरोडको पहिचान हराउन लागेको भन्दै केही व्यवसायीले आपत्तिसमेत जनाएका छन् । स्थानीय व्यापारी राम महर्जनले फुटपाथ निर्माणका लागि ल्याइएका सामग्रीले पसलमा आवतजावत गर्न गाह्रो भएको गुनासो गरे ।

 

'फुटपाथ निर्माण गर्न सामग्री ल्याएको एक हप्ताभन्दा बढी भइसक्यो । फुटपाथ निर्माणमा मानिस काम गरेको देखिँदैन,' उनले भने ।

सामग्री झारेपछि समयमा काम गरेर व्यापारी तथा स्थानीयवासीलाई आवतजावतमा सहज हुने महर्जनको भनाइ छ । विकास निर्माणको काम थालिसकेपछि सम्पन्न गरिहालेमा सहरको सौन्दर्यता बढ्नेमा उनको विश्वास छ ।

'सिमेन्टका ब्लक र कालो पाइप पसल अगाडि थुपारिएको छ । पाइप र ब्लक हेरेर बस्नुपरेको छ,' उनले भने, 'ग्राहकहरू पाइपमा ठोक्किएर लड्ने हो कि भन्ने त्रास बढिसक्यो । महानगर वा निर्माण कम्पनीले कामलाई सम्पन्न गर्न तीव्र रूपमा कामलाई अगाडि बढाइनुपर्छ ।'

फुटपाथ बढाए पनि व्यापारीलाई केही असर नगर्ने उनको भनाइ छ । महानगरले अहिले फुटपाथ बढाउने भनिएको ठाउँ एक वर्षदेखि खाली छ । यसभन्दा अघि मोटरसाइकल पार्किङ थियो ।

'पार्किङ गर्न आउनेहरू सबै ग्राहक हुन सक्छन् भन्ने प्रमाण छैन,' महर्जनले थपे, 'पार्किङ गरेर कोही घुम्न र विभिन्न रेष्टुरेण्टमा खान आउने हुन्छन् । कसैलाई पार्किङ नगर भन्न मिल्दैन ।'

त्यसैगरी, अर्का सुनचाँदी व्यवसायीको गुनासो पनि महर्जनको जस्तै छ । फुटपाथ बढाउन महानगरले जति चासो लियो तर त्यसलाई फिनिसिङ्ग गर्न चासो नदिएको ती व्यवसायीले इकागजसँग गुनासो गरे ।

'सडकको छेउछाउमा निर्माण सामग्री राखिएको छ,' उनी भन्छन्, 'पसलको अगाडि पाइप र ब्लक राखिएको छ । अगाडि के-के न गर्न राखे जस्तो गरिएको छ निर्माण हुन्छ न प्रक्रिया नै अगाडि बढ्छ ।'

ग्राहकहरूले फुटपाथ निर्माणका लागि ल्याइएका सामग्रीले यताउता हिँड्न अवरोध गरेको गुनासो गर्न थालेको उनले बताए ।

महानगरले भने न्युरोडको फुटपाथ विस्तार आयोजनाको नामकरण गरेको छ । फुटपाथ निर्माण गर्ने काम आरोग्य-साइटेक जे.भीले जिम्मेवारी पाएको छ । २ करोड १८ लाख १६ हजार ९ सय रुपैयाँमा महानगरले वडा २४ र २२ को फुटपाथ निर्माणको ठेक्का लगाइसकेको छ । कम्पनीले २०८१ चैत मसान्तसम्म निर्माण सम्पन्न गरिसक्नु पर्नेछ ।

तर, काठमाडौँ महानगरका प्रवक्ता नवीन मानन्धरले भने न्युरोडको फुटपाथ विस्तार कार्यले तीव्रता पाउने बताए । महानगरले फुटपाथ निर्माण सुरु भएको ठाउँमा काम अगाडि बढाइसकेको उनको जिकिर छ ।

उनले महानगरले फुटपाथ निर्माण गर्न ठेक्का लगाएर कम्पनीलाई जिम्मा दिइसकेको छ । ठेकेदार कम्पनीले फुटपाथ निर्माणमा केही दिन मात्र ढिला गरेको हुन सक्ने उनले बताए ।

'हामीले सामग्री अलपत्र पारेको यस विषयमा ठेकेदार कम्पनीलाई बुझाउने छौं,' उनी भन्छन् ।