चट्याङले विद्युत् ट्रान्सफर्मर जल्दा ९० घर उपभोक्ता तीन दिनदेखि अन्धकारमा

खोटाङ- दिक्तेल रुपाकोट मझुवागढी नगरपालिका–११ खार्मीका ९० घर विद्युत् उपभोक्ता तीन दिनदेखि अन्धकारमा बस्न बाध्य बनेका छन् । साउन १५ गते साँझ वर्षासँगै परेको चट्याङले ट्रान्सफर्मर जलेपछि खार्मीस्थित सोती, फूलबिसौना, डढेली र खत्रीगाउँमा उपभोक्ता अन्धकारमा बस्न बाध्य भएका हुन् ।

चट्याङले जलेको ट्रान्सफर्मर मर्मतका लागि तीन दिनपछि प्राविधिक टोली आए पनि अर्को फेर्नुपर्ने भन्दै फर्किएको स्थानीय विक्रम राईले बताए । ‘विद्युत् अवरुद्ध भएपछि प्राविधिकलाई पटक–पटक फोन गर्यौँ । तीन दिनपछि आज आउनुभएको थियो । तर, अर्को ट्रान्सफर्मर फेर्नुपर्छ भन्दै मर्मत नै नगरी फर्किनुभयो,' उनले भने, ‘तीन दिनदेखि हामी अन्धकारमा बस्न बाध्य छौँ । कहिले पुनःसञ्चालन गरिदिने हो टुंगो छैन । प्राधिकरणको बेवास्ताले हामी मारमा परेका छौँ ।’

---

तीन दिनदेखि विद्युत् अवरुद्ध हुँदा मोबाइल फोन स्वीच अफ हुनुका साथै कुटानीपिसानीका काम गर्ने मिलसमेत बन्द भएको स्थानीयले बताएका छन् । आफ्नो गाउँमा विद्युत् सञ्चालन भएपछि उज्यालोका लागि त्यसअघि प्रयोग हुँदै आएको टुकीसमेत विस्थापन गरिएकाले समस्या भएको उपभोक्ताहरूले बताएका छन् ।

अवरुद्ध विद्युत् सञ्चालनका लागि उपभोक्ता आफैँले अर्को ट्रान्सफर्मर ढुवानी गरेर ल्याउनुपर्ने भन्दै निरीक्षणमा आएको प्राविधिक फर्किएको स्थानीय बासिन्दा एवं नेपाल कम्युनिष्ट पार्टी (एकीकृत समाजवादी) खोटाङका सदस्य हर्कराज राईले जानकारी दिए ।

‘हामीले महसुल तिर्ने हो । महसुल तिरिसकेपछि बिग्रिएको ठाउँमा विद्युत् प्राधिकरणले मर्मत गर्नुपर्छ,' उनले भने, ‘प्राधिकरणका कर्मचारी गैरजिम्मेवार ढंगले प्रस्तुत भए । यसप्रति सम्बन्धित निकायले ध्यान दिन जरुरी छ ।’

खार्मीसँगै निर्मलीडाँडा र बाहुनीडाँडामा जडान गरिएको विद्युतको ट्रान्सफर्मरसमेत साउन १५ गतेको चट्याङले जलेको जनाइएको छ । विद्युत् ट्रान्सफर्मर जलेपछि निर्मलीडाँडा र बाहुनीडाँकाका स्थानीय उपभोक्ता अन्धकारमा बस्न बाध्य छन् ।

दश स्थानीय तह रहेको जिल्लामा अन्य ठाउँमा पटकपटक विद्युत् अवरुद्ध हुँदै आएको छ । पटकपटक अवरुद्ध हुँदै आएको विद्युत् प्राधिकरणले समयमा मर्मत गरेर पुनःसञ्चालनमा नल्याउँदा उपभोक्ता हैरानीमा पर्ने गरेका छन् ।

जिल्लामा सञ्चालन गरिएको विद्युत् छिनछिनमा आउने तथा छिनछिनमा जाने समस्याले घरमा जडान गरिएका मिटरबक्स, फ्युज तथा बल्ब जल्ने गरेको उपभोक्ताले बताएका छन् । लामो दूरी, जङ्गलको बाटो, होचो खम्बा र ठाउँठाउँमा पहिरो जानाले पटकपटक विद्युत् अवरुद्ध हुने गरेको विद्युत प्राधिकरणले बताउँदै आएको छ ।

ट्रान्सफर्मर जलेर अवरुद्ध भएको विद्युत् पुनःसञ्चालनमा ल्याउनका लागि पहल भइरहेको नेपाल विद्युत् प्राधिकरण दिक्तेल वितरण केन्द्र खोटाङका प्रमुख सोवितबहादुर क्षेत्रीले बताए । ‘साउन १५ गतेको चट्याङले तीन ठाउँको ट्रान्सफर्मर जलेको भन्ने जानकारी प्राप्त भएको छ । तीनवटै ठाउँमा नयाँ ट्रान्सफर्मर जडान गरेपछि मात्र विद्युत् सञ्चालन गर्न सकिन्छ,' उनले भने, ‘कार्यालयमा गाडी नभएका कारण ट्रान्सफर्मर पठाउन सकिएको छैन । कार्यालयको गाडी विराटनगर गएको छ । उताबाट फर्किएपछि पठाउने तयारी गरेका छौँ ।’

पछिल्लो समय ३३ केभी प्रसारण लाइनमा आएको समस्याका कारण जिल्लामा सञ्चालन गरिएको विद्युतमा समस्या आएको दिक्तेल वितरण केन्द्रका प्रमुख क्षेत्रीले बताएका छन् । विसं २०५७ मा तत्कालीन प्रधानमन्त्री गिरिजाप्रसाद कोइरालाले उद्घाटन गरेको केन्द्रीय प्रसारण लाइनको विद्युत् जिल्लाका सबै स्थानीय तहमा विस्तार पुगेको छ ।

जिल्लामा विस्तार गरिएको विद्युत् पानी पर्दा, हावा चल्दा र बाढी तथा पहिरो आउनासाथ अवरुद्ध हुने गरेको छ । वर्षातको समयमा अवरुद्ध भएको विद्युत् पुनःसञ्चालनमा ल्याउन प्राधिकरणले हप्ता दिनसम्म लगाउने गरेको छ ।

वर्षातको समयमा विद्युत् अवरुद्ध नहोस् भनेर प्राधिकरणले प्रसारण लाइन वरपर रहेको झाडी फाँड्ने गरेको छ । जंगलको बाटो भएर उदयपुरको जलजलेबाट खोटाङको बुइँपामा ल्याएर सवस्टेशनमा जोडिएको विद्युत् खोटाङ, ओखलढुङ्गा र सोलुखुम्बुगरी तीन जिल्लामा विस्तार गरिएको छ । रासस