नगर प्रहरीलाई प्रमुख महर्जनको निर्देशन : कसैको दबाब वा प्रभावमा नपरी काम गर्नू

काठमाडौँ- ललितपुर महानगर प्रमुख चिरीबाबु महर्जनले कसैको दबाब वा प्रभावमा नपरी काम गर्न नगर प्रहरीलाई निर्देशन दिएका छन् ।

बिहीबार ललितपुरमा महानगरद्वारा प्रकाशित तस्बिरमा–नगर प्रहरी नामक पुस्तकको विमोचन गर्दै महर्जनले नागरिकको सेवामा केन्द्रित भइ कसैको दबाब वा प्रभावमा नपरी काम गर्न नगर प्रहरीलाई निर्देशन दिएका हुन् ।

---

नगर प्रहरीले नागरिकमैत्री भएर सकारात्मक काम गरिरहेको भन्दै उनले महानगरबाट भएका निर्णय विवाद रहित तवरले कार्यान्वयन गर्न सफल भएको समेत बताए । महर्जनले महानगरभित्रका मूर्त तथा अमूर्त सम्पदा संरक्षणमा शून्य सहनशीलताको नीतिअनुसार काम गरिरहेको जिकिर गरे । उनले आफ्नो क्षेत्रभित्र रहेका सम्पूर्ण सम्पदालाई सम्मान र व्यवस्थापन गर्दै सुधारका लागि अघि बढेको धारणा राखे ।

पुस्तकमा नगर प्रहरीले कार्यसम्पादनको सिलसिलामा गरेका सुधार कामहरूलाई समेटिएको तस्बिर समावेश गरिएको छ ।