काठमाडौँ- पोखरा उद्योग वाणिज्य संघको निर्वाचन नजिकिदै छ । यतिखेर सबै जना आ-आफ्नो समूहको तर्फबाट मत माग्न हिँडिरहेका छन् । विगतको समितिमा भन्दा यस पटक चुनावी माहोल भिन्न देखिएको छ । युवा उम्मेदवारको अनुहार देखिन्छ । किनभने यसपटक संघलाई आर्थिक मन्दीले गिजोलिएको पोखरालाई सम्हाल्नु पर्ने भारी दायित्व छ ।

यहीँ जिम्मेवारीलाई काँधमा राख्न पोखराका युवा उम्मेदवार सौगात थापाले सदस्य पदमा उम्मेदवारी दिएका छन् । उनले भाद्र २८ र २९ गते हुने उद्योग वाणिज्य संघको ३५ औं महाधिवेशनमा अध्यक्ष पदका उम्मेदवार अर्जुन पोखरेलको प्यानलबाट कार्यसमिति सदस्यमा उम्मेदवारी दिएका हुन् ।

---

तर, यस पटक भने समितिमा सदस्यका लागि उम्मेदवारी दिएर उनले युवाको परिचय खोजिरहेका छन् । व्यावसायिक घराना अंशुभरा ग्रुपका प्रबन्ध निर्देशक थापा पहिलो र दोस्रोबाट तेस्रो पुस्तामा नेतृत्व रुपान्तरण लागि परेका छन् ।

पवन प्रजापति अध्यक्ष हुँदा कार्यसमितिमा मनोनीत सदस्य भएका सौगात तेस्रो पुस्ताका विश्वासिलो र क्षमतावान् उम्मेदवार मानिन्छन् । सानै उमेरदेखि जिम्मेवारी सम्हालेका सौगात नयाँ पुस्ताका लागि उदाहरण बनेका छन् । उनी अहिले उठेका उम्मेदवारहरूमध्ये सबैभन्दा कम उमेरका खुला सदस्य पदको उम्मेदवारसमेत हुन् ।

उनले व्यवसायलाई परिमार्जन गर्दै र उच्च लगानीले समेत व्यावसायिक आकार र आयतनमा फेरबदल ल्याएका छन् । उनका अनुसार बगैँचा रिसोर्ट एण्ड स्पा रिनोभेसन हुँदैछ । बदलिँदो परिवेशमा संरचना बद्लिँदै गएका छन् ।

३१ एभिन्यु नाम दिएर बन्दै गरेको मिक्सिड युज बिल्डिङले पोखराको पर्यटन क्षेत्रमा महत्वपूर्ण टेवा पुग्ने विश्वास गरिएको छ ।

नेपालकै नमुना बिल्डिङमा होटल सँगै अन्य रिटेल सुविधा एउटै छानामुनि उपलब्ध गराउने लक्ष्यका साथ संघको निर्वाचनमा होमिएको उनी बताउँछन् । लेकसाइडको केन्द्रविन्दुमा रहेको अंशुभरा स्क्वायर मलले समेत सौगातको परिचय बद्लिएको छ ।

चिप्लेढुंगामा रहेको पोखरा टेर्डमलको बोर्ड अफ डाइरेक्टर समेत रहेका उनले आफ्नै सक्रियतामा उक्त व्यवसायलाई समेत परिमार्जित रूप दिने बताए । उनका अनुसार अंशुभराले अटोमोबाइल, रियल स्टेट, हस्पिटालिटी र वित्तीय संस्थामा लगानी गरेको छ ।

‘अंशुभरा अब ब्राण्ड बन्दै छ । एउटै छानामुनि सबै खालको सुविधा उपलब्ध गराउने हेतुले खोलिएको कम्पनीमा धेरै जना आश्रित छन्,’ उनले भने, ‘व्यवसाय सँगै सामाजिक कार्यमा समेत सौगातको सक्रियता पाइन्छ । पोखरा उद्योग वाणिज्य संघमा आबद्ध भई व्यवसायीको हक, हित र अधिकारका लागि आवाजलाई बुलन्द बनाउने बाटोमा अगाडि बढ्दै छु ।’

पछिल्लो समय राजनीतिमा अब युवा भन्ने भाष्य स्थापित भएको छ । युवाहरू सदनमा नै पुगेको देखिन्छ । सामाजिक संस्थामा समेत युवाहरूको नेतृत्वदायी भूमिका देखिन्छ । तर थाहा राजनीतिमा भन्दा व्यवसायमा देखिने अनुहार बनिसकेको छ ।

तीनै युवा मध्येका थापा पनि युवाहरूको प्रतिनिधित्व गर्दै उद्योग वाणिज्य संघको निर्वाचनमा नेतृत्व लिन कस्सिएका छन् । उद्यम, कृषि र पर्यटनलाई आत्मसात् गर्दै यस क्षेत्रमा युवाहरूलाई प्रवेश गराउने उद्देश्य रहेको उनले प्रस्ट पारे ।

उनले अगाडि थपे, ‘पछिल्लो समय युवामा वितृष्णा आएको छ । सम्भावना हुँदाहुँदै पनि देश छाडेर परदेश गएका छन् । युवालाई स्वरोजगार गराउने उद्देश्य स्वरूप अर्जुन पोखरेलको प्यानल लागिरहेको छ । हामी कुरा होइन काम गर्नका लागि आएका हौं । निर्वाचित भइसकेपछि पोखरेली व्यवसायीको हितबमोजिम नै काम गर्छौं । यसमा हाम्रो टीम एकरूप भएर अगाडि बढ्छ ।’

थापाका अनुसार वाणिज्य संघ अब युवाको नेतृत्वमा अगाडि बढ्नेछ । पोखरा उद्योग वाणिज्य संघको इतिहासमा नै पहिलो पटक तेस्रो पुस्ता कार्यसमिति सदस्य पदमा उम्मेदवारी दिएको भेटिन्छ ।

२०७१ सालमा सौगातका बुवा विन्दुकुमार थापाले उद्योग वाणिज्य संघको नेतृत्व सम्हालेका थिए । हाल उनी गण्डकी प्रदेश सरकारको सामाजिक विकास तथा स्वास्थ्य मन्त्री छन् ।

बुवाकै पथमा हिँडिरहेका उनी परिवर्तनमा विश्वास गर्छन् । उद्योग वाणिज्य संघको साख जोगाउन र सम्पूर्ण व्यवसायीलाई एकीकृत गराई उनीहरूको समस्यालाई समाधान गर्न थापाको उम्मेदवारी हो ।

सौगातले यसअघि नै दुई वर्षे कालमा उद्योग वाणिज्य संघलाई नयाँ स्वरूप दिन खोजे । नयाँ पुस्ताको नयाँ सोचमा उद्योग वाणिज्य संघ चल्नुपर्ने धारणा व्यक्त गरे ।
आर्थिक मन्दीले पोखराका व्यवसायीले भोग्नुपरेका समस्यालाई समाधान गर्न पहल गर्ने उद्देश्यसहित सौगात अगाडि बढिरहेका छन् । उनको संघमा किन उम्मेदवारी भन्ने सवालमा भन्छन्, ‘सबल, सक्षम, सुदृढ र आत्मनिर्भर उद्योग वाणिज्य बनाउँछ ।‘