कुटपिटबाट एकको मृत्यु, पाँच जना पक्राउ

धनगढी : कञ्‍चनपुरमा मदिरा सेवनपछि भएको विवाद कुटपिटमा परिणत हुँदा एक जनाको मृत्यु भएको छ । जिल्लाको भीमदत्त नगरपालिका-९ खल्लामछेट्टीका ३२ वर्षीय गणेश बोहराको ज्यान गएको हो । 

जिल्ला प्रहरी कार्यालय कञ्चनपुरका अनुसार कुटपिटपछि घाइते भएका बोहराको उपचारका लागि महाकाली अस्पताल ल्याउने क्रममा सोमबार बिहान ज्यान गएको हो । स्थानीयका अनुसार बोहरा र प्रकाश पालबीच विवाद भएको थियो । 

---

मदिरा सेवनपछि एकआपसमा कुटपिट भएको भीमदत्त नगरपालिका-९ का वडाध्यक्ष राम नाथले बताए । मृतकका परिवारले बोहराको हत्या भएको भन्दै अनुसन्धानको माग राखेका छन् । 

मृत्युपछि आरोपित प्रकाश पालसहित ५ जनालाई नियन्त्रणमा लिएको जिल्ला प्रहरी कार्यालय कञ्चनपुरका प्रवक्ता प्रहरी नायब उपरीक्षक सिद्धराज न्यौपानेले जानकारी दिए । बोहराको शव महाकाली अस्पतालमा राखिएको छ ।