सप्तरीबाट लागूऔषधसहित दुई जना पक्राउ

सप्तरी : सप्तरीको हनुमाननगर कंकालिनी नगरपालिका १४ मल्हनियास्थित सीमा ईलाकाबाट लागुऔषधसहित दुई जना पक्राउ परेका छन् । असार २० गते सशस्त्र प्रहरीले विभिन्न किसिमका लागूऔषधसहित दुई जनालाई पक्राउ गरेको हो । 

पक्राउ पर्नेमा उदयपुर जिल्लाको त्रियुगा नगरपालिका ११ बस्ने ३३ वर्षीय चोलाधर पोख्रेल र सप्तरी जिल्लाको सुरुङ्गा गाउँपालिका ९ बस्ने ३० वर्षिया रोमा विश्वकर्मा छन् । 

---

भारतबाट नेपालतर्फ आउँदै गरेका उनीहरुलाई सशस्त्र प्रहरी बल नेपाल बोर्डर आउट पोष्ट तिलाठीबाट खटिएको सशस्त्र प्रहरीले शंका लागि जाँच गर्दा उनीहरुको साथमा डाईलेक्स डिसी १० बोतल, नाईट्राजेपाम ट्याब्लेट २० वटा, स्पास कोरभोम प्लस १ सय ४४ वटा र १ थान मोवाईल फेला पारेको हो ।

पक्राउ परेका दुवै जनालाई बरामद लागूऔषध तथा मोवाईलसहित आवश्यक कारबहीको लागि नेपाल प्रहरीलाई बुझाइएको छ । 

यसैबीच झापाको बाह्रदशी गाउँपालिका २ स्थित मनकामना सामुदायिक वनबाट करिब तीन लाख रुपैयाँ बराबरको ७० क्यूफिट सालको काठसहित एक जना पक्राउ परेका छन् । पक्राउ पर्नेमा हल्दिवारी गाउँपालिका ५ बस्ने ३२ वर्षीय गोबा लिम्बु रहेका छन् । 
        
उक्त जंगलबाट काठ काटेर लैजाँदै गरेको अवस्थामा उनलाई सशस्त्र प्रहरी बल नेपाल बोर्डर आउट पोष्ट भागडुब्बाबाट खटिएको सशस्त्र प्रहरीले पक्राउ गरेको हो ।