तीन विद्यालयका विद्यार्थीलाई न्यानो कपडा वितरण

अर्घाखाँची- अर्घाखाँचीको मालारानी गाउँपालिका–४ मा सामुदायिक विद्यालयमा अध्ययनरत तीन सय २० जना विद्यार्थीलाई न्यानो कपडा वितरण गरिएको छ । चिसोको समयमा न्यानो कपडा पाएपछि विद्यार्थी खुसी भएका छन् ।

मालारानी –४ का तीन विद्यालयमा अध्ययनरत विद्यार्थी र अध्यापनरत शिक्षकलाई न्यानो पोशाक वितरण गरिएको हो । मालारानी गाउँपालिकाका अध्यक्ष दलबहादुर भट्टराईले न्यानो ट्र्याकसुट सेट वितरण गरेका हुन् । किरण माध्यमिक विद्यालय निन्युखर्कका दुई सय ५० विद्यार्थी, १७ शिक्षक, जाँलकाँडा आधारभूत विद्यालय थामका ५० विद्यार्थी, सात शिक्षक र सार्वजनिक आधारभूत विद्यालय ब्याडपाटाका २० विद्यार्थीलाई न्यानो पोशाक प्रदान गरिएको थियो ।

---

किरण मावि, विद्यालय व्यवस्थापन समितिका अध्यक्ष कृष्णप्रसाद खनालले विद्यार्थीहरुलाई न्यानो पोशाक सरकारले दिनुपर्ने बताए । कार्यक्रममा जनप्रतिनिधि, विद्यालय व्यवस्थापन समिति, शिक्षक अभिभावक सङ्घ, शिक्षक विद्यार्थीलगायतको उपस्थिति थियो ।-रासस