जुम्लामा कुटपिट र जातीय विभेदको घटना मिलाउने प्रहरीको प्रयास

काठमाडौँ : वडाध्यक्षले कुटपिट गर्दै जातीय विभेद गरेको उजुरी लिन अस्वीकार गरेको जुम्ला प्रहरीले पीडित युवा विवेन्द्र नेपाली र वडाध्यक्ष कालीबहादुर बुढालाई छलफलका लागि बोलाएको छ । बुधबार नै पीडित युवा आफूमाथि जातीय विभेद भएको भन्दै उजुरी दर्ता गराउन जिल्ला प्रहरी कार्यालय पुगेका थिए ।

तर उनको उजुरी लिन नमानेको प्रहरीले बिहीबार पीडित युवासँगै वडाध्यक्ष बुढालाई बिहान ११ बजे छलफलमा बोलाएको जुम्ला प्रहरीका डीएसपी दानबहादुर थापाले जानकारी दिए । दुवै पक्षलाई छलफलमा बोलाएर घटनाबारे वास्तविकता बुझेपछि मात्रै उजुरी लिन सकिने उनले बताए । 

---

उनले उजुरी लिन नमानेको विषय अस्वीकार गर्दै घटनाबारे बुझ्ने प्रयास भइरहेको बताए । छलफल बोलाएपछि घटनाबारे बुझेर मात्रै थप जानकारी दिन मिल्ने भन्दै उनी पन्छिए ।

‘घटनाबारे बुझ्ने हाम्रो काम हो । बुझ्दैछौँ’ उनले इकागजसँग टेलिफोनमा भने, ‘जातीय विभेद हो भनेपनि नियम कानुन सबै कुरा हुन्छ । हामीले छलफलमा बोलाएका छौँ । दुवै पक्षको कुरा सुनेपछि मात्रै थप भन्न मिल्छ ।’

तर पीडित युवाले प्रहरीले उजुरी लिन अस्वीकार गरेर आफूलाई झन विभेदमा पारेको बताएका छन् । सिँजा गाउँपालिकाका ६ का वडाध्यक्ष बुढाले फोनमा गालीगलौज, वडा कार्यालयमा बोलाएर कुटपिट गरेको पीडित युवाको आरोप छ । वडाध्यक्षका छोरा नवीन बुढाले पनि आफूमाथि कुटपिट गरेको पीडित युवाले बताएका छन् । स्थानीय दलित अधिकारकर्मीले युवालाई कुटपिट गर्ने र जातीय विभेदको गालीगलौज गर्ने वडाध्यक्ष बुढालाई बचाउन प्रहरीले घटना मिलाउन खोजिरहेको दाबी गरेका छन् ।