नगद र चेक चोरी गरेर फरार अभियुक्त १५ दिनपछि पक्राउ

काठमाडौँ – नगद र चेक चोरी गरेर फरार दुई अभियुक्तलाई प्रहरीले १५ दिनपछि पक्राउ गरेको छ । मध्यपुरथिमि नगरपालिका–२ सानो ठिमीस्थित आकृति हार्डवेयरबाट नगद र चेक चोरेर फरार उनीहरूलाई प्रहरीले आइतबार पक्राउ गरेको हो ।

काठमाडौं महानगरपालिका–३२ पेप्सिकोला बस्ने पवित्रा भुसालले सानोठिमीमा सञ्चालन गरेको हार्डवेयर पसलबाट यही १५ साउनमा एक लाख नगद र ३५ हजार रूपैयाँको नेपाल बैंकको चेक चोरी गरी फरार दुई अभियुक्तलाई महानगरीय प्रहरी वृत्त ठिमीले आइतबार पक्राउ गरेको प्रहरी नायव उपरीक्षक दीपक गिरीले जानकारी दिए ।

---

पक्राउ पर्नेमा मोरङ वीरेन्द्रनगर नपा ३ घर भई हाल काठमाडौं कपन बस्ने ५१ वर्षीय राजु तामाङ र सिन्धुपाल्चोक भोटेकोशी नपा– ६ घर भई हाल काठमाडौं कपनमै बस्ने ४२ वर्षीय छिरिङ शेर्पा रहेको प्रहरीले जनाएको छ ।