लागूऔषध कारोबार र ओसारपसारमा एक भारतीयसहित सात पक्राउ

काठमाडौँ - नेपाल प्रहरीले देशका विभिन्न जिल्लाबाट लागूऔषध कारोबार र ओसारपसारमा संलग्न सात जनालाई पक्राउ गरेको छ । काठमाडौं महानगरपालिका- ३२ नरेफाँट बस्ने काभ्रे तिमाल गाउँपालिका- ८ घर भएका ३० वर्षीय विक्रम तामाङलाई १०.३८ मिलिग्राम अवैध लागूऔषध ब्राउनसुगर, १ सय १ एम्पुल नोर्फिन, १ सय एम्पुल फेनारगन, ९९ एम्पुल डाईजेपाम, नगद ४८ हजार ५ सय रूपैयाँ र ९ हजार भारतीय रूपैयाँसहित शुक्रबार दिउँसो प्रहरीले पक्राउ गरेको हो । 

उनको डेरा कोठामा लागूऔषध कारोबार भइरहेको भन्ने विशेष सूचनाको आधारमा महानगरीय प्रहरी प्रभाग कोटेश्वरबाट खटिएको प्रहरीले कोठा तलासी गर्दा उक्त लागूऔषध फेला पारी उनलाई प्रहरीले पक्राउ गरेको हो ।

---

यस्तै झापाको बिर्तामोड नगरपालिका- ९ देवकोटा चोकबाट ५ ग्राम ५ सय १० मिलिग्राम अवैध लागूऔषध ब्राउनसुगरसहित २ जनालाई शुक्रबार दिउँसो प्रहरीले पक्राउ गरेको छ । पक्राउ पर्नेहरूमा सोही नगरपालिका-८ बस्ने २० वर्षीय गोपाल विश्वकर्मा र सोही नगरपालिका-८ मा डीडीआर फार्मेसी सञ्चालन गरी बस्ने इलाम माई नगरपालिका-६ घर भएका २० वर्षीय भिष्म बुढाथोकी रहेका छन् । विषेश सूचनाको आधारमा इलाका प्रहरी कार्यालय अनारमनीबाट खटिएको प्रहरी टोलीले उनीहरूलाई उक्त लागूऔषधसहित फेला पारी पक्राउ गरेको हो ।

यस्तै कञ्चनपुर जिल्लाको कृष्णपुर नगरपालिका– २ प्रगति टोलबाट ४ केजी ४ सय ९० ग्राम अवैध लागूऔषध चरेसजस्तो देखिने पदार्थसहित कैलाली धनगढी उपमहानगरपालिका–७ बस्ने २१ वर्षीय किशोर सिंहलगायत ३ जनालाई शुक्रबार दिउँसो प्रहरीले पक्राउ गरेको छ । इलाका प्रहरी कार्यालय झलारीबाट खटिएको प्रहरीले उनीहरूलाई उक्त पदार्थसहित फेला पारी पक्राउ गरेको हो ।

यसैगरी बारा जिल्लाको निजगढ नगरपालिका–९ सहिद चोकबाट ७.५ किलो अवैध लागूऔषध गाँजासहित भारत बिहार राज्य गोपालगञ्ज घर भएका २९ वर्षीय अतुलकुमार साहलाई शनिबार बिहान प्रहरीले पक्राउ गरेको छ । इलाका प्रहरी कार्यालय निजगढबाट खटिएको प्रहरी टोलीले उनलाई उक्त लागूऔषधसहित पक्राउ गरेको हो । यस सम्बन्धमा प्रहरीले थप अनुसन्धान अगाडि बढाएको जनाएको छ ।