काठमाडौंका सडकमा थुप्रिएको फोहोर मेयरलाई  ‘उपहार’

काठमाडौँ – काठमाडौं महानगरक्षेत्रमा थुप्रिएको फोहोर महानगरपालिकाका मेयर विद्यासुन्दर शाक्यलाई ‘उपहार’ स्वरूप पठाइएको छ । युथ कांग्रेस नेपाल नामक संस्थामा आवद्ध युवाले सोमबार सुन्धारास्थित महानरगको केन्द्रीय कार्यालयको मूल गेटमा फोहोर फाल्दै मेयरलाई, ‘उपहारस्वरू फोहोर दिइएको,’ बताएका छन् ।

‘करिब एक महिनादेखि काठमाडौंका चोकचोक र सडकमा फोहोरको डंगुर थुप्रिएपछि सर्वसाधारणलाई स्वास फेर्नसमेत गाह्रो भएको छ,’ संस्थाका एक सदस्यले भने, ‘त्यसैले तत्काल फोहोर उठाउन ध्यानाकर्षण गराउँदै हामीले मेयरसा’बालाई फोहोर उपहार पठाएर रचनात्मक विरोध जनाएका हौं ।’

---

नुवाकोटको सिसडोलस्थित ल्याण्डफिल साइट पुग्ने सडक वर्षाका कारण बिग्रिएको र स्थानीयले अवरोध गरेपछि फोहोर उठाउन नसकिएको काठमाडौं महानगरपालिकाले बताउँदै आएको छ । काठमाडौंमा थुप्रिएको फोहोर तत्काल उठाएर महानगर सफा राख्न काठमाडौं महानगरलाई दबाब बढ्न थालेको छ । लगातारको झरीले फोहोर कुहिँदा दुर्गन्धसमेत फैलिएको छ ।

मेयर शाक्यले केही दिनमै फोहोर उठाइने आश्वासन दिँदै सडकमा जथाभावी फोहोर नफ्याँक्न महानगरबासीलाई आह्वानसमेत गरेका छन् । काठमाडौं र ललितपुर दुई महानगरसहित उपत्यकाका १८ वटा नगरपालिकाले सिसडोलमा करिब २ दशकदेखि अस्थायी रूपमा फोहोर फ्याँक्दै आएकोमा ल्याण्डफिल साइटको दीर्घकालीन व्यवस्था गर्न केन्द्रीय सरकारलेसमेत ध्यान दिएको छैन ।