धनगढीका जेष्ठ नागरिक सम्मानित

कैलाली - ३१ औं अन्तर्राष्ट्रिय जेष्ठ नागरिक दिवसको अवसरमा धनगढी उपमहानगरपालिका वडा नम्बर १५, १६ र १७ का जेष्ठ नागरिकहरू सम्मानित भएका छन् । धनगढी उपमहानगरपालिका वडा नम्बर १५ को आयोजना भएको जेष्ठ नागरिक सम्मान कार्यक्रममा वडाका दर्जन भन्दा बढी जेष्ठ नागरिकहरू सम्मानित भएका छन ।

जेष्ठ नागरिकहरूलाई धनगढी उपमहानगरपालिकाका मेयर नृपबहादुर वडले सम्मानित गरेका हुन् । सम्मान गर्दै मेयर वडले जेष्ठ नागरिकहरू प्रेरणाको श्रोत भएको बताउँदै सम्मान गर्न पाउँदा निकै खुशी लागेको बताए । उनले नगरभित्रका सम्पुर्ण जेष्ठ नागरिकहरूको अभिलेख राख्ने काम उपमहानगरपालिकाले गरिराखेको बताउँदै आगामी दिनमा जेष्ठ नागरिकहरूका लागि विभिन्न खाले कार्यक्रम गर्ने बताए । जसमा स्वास्थ्य सेवालाई प्राथमिकता राखेको मेयर वडले बताए ।

---

धनगढी उपमहानगरपालिका वडा नम्बर १५ ले आयोजना गरेको कार्यक्रममा सह-आयोजक बेहडाबाबा जेष्ठ नागरिक समाज रहेको थियो भने फाया नेपाल र राष्ट्रिय मानव अधिकार आयोगले सहकार्य गरेका थिए । कार्यक्रममा बेहडाबाबा जेष्ठ नागरिक समाजका सस्थापक अध्यक्ष गंगाराम चौधरीलाई मरणोपरान्त सम्मान गरिएको थियो । त्यस्तै १०४ वर्षीया रम्मा रानालाई समेत दोसल्ला ओढाएर मेयर वडले सम्मान गरेका थिए । 

जेष्ठ नागरिक शंकरी रानाले जेष्ठ नागरिकलाई सम्मान गरेर स्थानीय सरकारले जेष्ठ नागरिकका लागि पनि सरकार रहेको अनुभूति गराएको बताउँदै आयोजकलाई धन्यवाद दिए । त्यस्तै जेष्ठ नागरिक पहिचान गर्ने उद्देश्यले प्रदेशमै पहिलोपटक ७० वर्ष भन्दामाथिका उमेर समूह भएको घरमा रातो झण्डा राख्ने काम समेत सोही कार्यक्रम गरिएको थियो ।