श्रीमती बिक्री गर्ने श्रीमान् पक्राउ

काठमाडौँ – श्रीमतीलाई भारतको आगरास्थित कोठीमा बिक्री गरेको आरोपमा उनका श्रीमान पक्राउ परेका छन् । उनलाई प्रहरीको मानव बेचबिखन अनुसन्धान ब्युरोले पक्राउ गरेको हो ।

प्रहरीका अनुसार ३४ वर्षीय श्रीमानले ०७१ सालमा पीडितलाई बिक्री गर्नुअघि उनीहरूबाट ५ सन्तान जन्मिएका थिए। प्रेम सम्बन्धपछि उनीहरूबीच विवाह भएको थियो । आरोपित श्रीमानले एक लाख ६० हजार रूपैयाँ लिएर ती महिलालाई पासाङ तामाङमार्फत काठमाडौंको बालाजुस्थित एक महिलाको जिम्मा लगाएको प्रहरीको भनाइ छ । 

---

ती महिलाले मासिक १० हजार रूपैयाँ पारिश्रमिक पाउने कामको बहाना देखाएर नाताले भिनाजु बताउने व्यक्तिको जिम्मा लगाएको र ती व्यक्तिले सुनौली नाका हुँदै उनलाई दिल्ली पुर्‍याएको ब्युरोले जनाएको छ । पीडित महिलाले आगरास्थित कोठीमा ८ महिना काम गरेकी थिइन्। पछि उनलाई फेरी दिल्लीमा ल्याएर कोठीमा काम लगाइएकोमा ३१ जेठ ०७८ मा त्यहाँबाट उद्धार गरिएको प्रहरीले जनाएको छ । ब्युरोले पीडित महिलाका श्रीमान र पासाङ तामाङलाई पक्राउ गरेको छ ।