सुर्खेत - मुगुको पिनागाउँमा भएको बस दुर्घटनामा मृत्यु हुनेको संख्या २८ पुगेको छ । नेपालगन्जबाट मुगुको गमगढीका लागि छुटेको भे १ ख १६७ नम्बरको बस छायानाथ रारा नगरपालिका ७ पिनागाउँमा दुर्घटना हुँदा मृत्यु हुनेको संख्या २८ पुगेको हो । 

जिल्ला प्रहरी कार्यालय मुगुका प्रहरी निरीक्षक जनकबहादुर धामीका अनुसार घटनास्थलमै २१ जनाको र थप ८ जनाको बाटोमा मृत्यु भएको हो । मृतकको संख्या अझै बढ्न सक्ने अनुमान गरिएको छ । 

---

घाइतेहरु मध्ये १२ जनालाई समिट एअरको जहाजबाट र तीन जनालाई नेपाली सेनाको हेलिकप्टरबाट नेपालगञ्ज लगिएको प्रहरी निरीक्षक धामीले जानकारी दिए । उनका अनुसार घाइतेमध्ये एक बालिकालाई जिल्ला अस्पताल मुगुमा उपचारको लागि लगिएको छ ।

‘घाइते बालिकाको अवस्था सामान्य रहेकाले पनि उनलाई उपचारका लागि जिल्ला अस्पतालमा राखिएको हो’ उनले भने, ‘हेलिकप्टरबाट उद्धार गरिएका सबै घाइतेहरुलाई उपचारको लागि नेपालगञ्ज लगिएको छ ।’ भौगोलिक विकटता र टेलिफोनको नेटवर्कले काम नगर्दा उद्धारमा समस्या भएको उनले बताए ।

घाइतेहरुलाई उद्धारको कार्य जारी रहेको कर्णाली प्रदेश प्रहरी प्रमुख गणेशबहादुर ऐरले जानकारी दिए । मुगुका प्रमुख जिल्ला अधिकारी रोमबहादुर महतले गाडी सडकबाट दुई सय मिटर तल खसेको बताए ।

दुर्घटनास्थल विकट स्थान भएकाले उद्धार कार्यमा कठिन भएको उनले जानकारी दिए । नेपालगञ्जबाट दसैंका लागि घर हिँडेका यात्रु लिएर गमगढी जाँदै गरेको बस पिनागाउँमा दुर्घटनामा परेको हो ।