भत्केको पुलबाट खोला तर्न खोज्दा सप्तरीमा युवक बेपत्ता

जनकपुरधाम - सप्तरीमा भत्केको जीता खोलाको पुल तर्ने क्रममा एक युवक बेपत्ता भएका छन् । बुधबार दिउँसो सप्तरीको हनुमाननगर कंकालनी नगरपालिका १४ बैरिया घाटस्थित जिता खोलाको भत्केको  पुलबाट तर्न खोज्दा बाढीमा बगेर हनुमाननगर कंकालनी ९ का २३ वर्षीय लालु कुमार मण्डल वेपता भएको जिल्ला प्रहरी कार्यालय सप्तरीले जनाएको छ ।

जिता खोलाको भत्केको पुलबाट तिलाठीबाट रामपुरमल्हनियातर्फ पैदल गइरहेको हनुमानगर कंकालनि ९ का २३ वर्षीय लालु मण्डल र २८ वर्षीय संजिव कुमार मण्डल तर्न खोज्दा संजिव तर्न सफल भएको तर लालु बेपत्ता भएको प्रहरी प्रवक्ता प्रहरी नायव उपरीक्षक माधवप्रसाद काफ्लेले जनाएको छ ।

---

बेपत्ता भएका लालुको खोजी तिव्र रुपमा भइरहेको छ । गत दुई दिनदेखि भएको अबिरल वर्षाको कारण पानीको बहाव बढदा जिर्ण रहेको खोलाको पुल भत्किन गएको हो । त्यस्तै वर्षाको कारण सप्तरीका ४ जनाको घर भत्केको छ । केही गाईबस्तुलाई बाढीले बगाएको छ ।