स्रोत नखुलेको नगद र गरगहनासहित धनगढीबाट तीन जना पक्राउ

कैलाली - धनगढीमा स्रोत नखुलेको झण्डै नौ लाख रूपैयाँ नगदसहित तीन जना पक्राउ परेका छन् । बझाङको मष्टा गाउपालिका– १ कोटदेवल बस्ने २२ वर्षीय मुकेश खड्का, १८ वर्षीय किरण खड्का र २४ वर्षीय नारायण खड्कालाई सोमबार प्रहरीले पक्राउ गरेको हो ।

उनीहरूको साथबाट ८ लाख ६९ हजार नेपाली र तीन हजार दुई सय भारतीय रकम पनि बरामद गरिएको जिल्ला प्रहरी कार्यालय कैलालीका प्रहरी नायव उपरीक्षक प्रतीक विष्टले जानकारी दिए । गोप्य सूचनाका आधारमा सुदूरपश्चिम प्रदेश प्रहरी कार्यालय र जिल्ला प्रहरी कार्यालयबाट खटिएको प्रहरी टोलीले उनीहरूलाई धनगढी उपमहानगरपालिका–४ स्थित होटल अमन प्लाजाबाट पक्राउ गरेको बिष्टले बताए ।

---

चेकजाँच गर्दा उनीहरूको साथबाट स्रोत नखुलेको रकमसँगै सुनजस्तो देखिने ३४.३६० ग्राम गरगहना र ७३७.८७ ग्राम चाँदीजस्तो देखिने विभिन्न गहना र समान पनि बरामद गरिएको विष्टले बताए । नियन्त्रणमा लिइएका उनीहरूलाई आवश्यक कारबाहीका लागि राजश्व अनुसन्धान कार्यालय कोहलपुर पठाइएको प्रहरीले जनाएको छ ।