धनुषामा ट्याक्टर दुर्घटना : दुई जनाको मृत्यु, १८ घाइते

जनकपुरधाम - बिहीबार धनुषामा भएको ट्याक्टर दुर्घटनामा परी दुई जनाको मृत्यु भएको छ । भूत मेलामा सहभागी हुन गइरहेका श्रद्धालुहरू सवार ट्याक्टर धनुषाको बेलापट्टीमा दुर्घटना भएको हो । दुर्घटनामा अठार जना घाइते भएको छ ।

धनुषा र सिरहा जिल्लाको सीमास्थित कमला नदीमा लाग्ने भूत मेलामा सहभागी हुन गइरहेका श्रद्धालुहरू बोकेका दुई ट्याक्टर एक अर्कालाई ओभरटेक गर्न खोज्दा विदेह नगरपालिका- ७ बेलापट्टीस्थित दुर्घटना भएको जिल्ला प्रहरी कार्यालय धनुषाले जानकारी दिएको छ ।

---

दुर्घटनामा घाइते भएका भारत बिहार सितामढी जिल्लाका ६० वर्षीय रामदयाल राय यादव र ४५ वर्षीया अम्बिका देवीको उपचारको क्रममा मृत्यु भएको धनुषाका प्रहरी प्रवक्ता प्रहरी नायव उपरीक्षक (डीएसपी) जीतेन्द्र बस्नेतले बताए । घाइतेहरूको स्थानीय स्वास्थ्य संस्था र प्रादेशिक अस्पतालमा उपचार भइरहेको उनले जानकारी दिए । प्रहरीका अनुसार दुर्घटनामा परेका दुवै टयाक्टर अनटेस्ट रहेका छन् । आफ्नो सिद्धी गर्न स्थानीय धामी झाक्रीहरू प्रत्येक वर्ष कमला नदी किनारमा लाग्ने भूत मेलामा सहभागी हुने गरेका छन् ।