लैंगिक हिंसाविरुद्धको १६ दिने अभियान लुम्बिनीमा सुरु

बुटवल - ‘घर र समाजको ऐक्यबद्धता, लैंगिक हिंसाविरूद्ध शून्य सहनशीलता’ भन्ने नारासहित विहिबारदेखि नेपालमा ३० औं अन्तर्राष्ट्रिय १६ दिने लैंगिक हिंसा विरूद्धको अभियान शूरू भएको छ । लुम्बिनी प्रदेशमा कानुन महिला, बालबालिका तथा जेष्ठ नागरीक मन्त्रालयले १६ दिने अभियानको शूभारम्भ गरेको छ । लुम्बिनी प्रदेशका मुख्यमन्त्री कुल प्रसाद केसीले लैंगिक हिंसा विरूद्धको १६ दिने अभियानको शूभारम्भ गरेका हुन् ।

उक्त अवसरमा बोल्दै मुख्यमन्त्री केसीले संविधान अनुसार नेपालमा कुनै पनि प्रकारको विभेद नरहेको बताए । तर, संविधानमा त्यसो भनिए पनि लैंगिक हिंसाको अवस्थामा भने सुधार आउन नसकेको बताए । ‘हामीले जे भनेका छौं, त्यो कार्यान्वयन भएको छैन, त्यसैले अब हामीले गर्ने कार्यक्रममा परिवर्तन ल्याउन जरूरी छ’ उनले भने । उनले सरकारी निकाय र संघसंस्थाले गर्ने कार्यक्रमको मोडालिटीमा समेत व्यापाक सुधार गर्नुपर्ने बताए । 

---

ग्रामीण भेगमा अझै पनि महिलाहिंसा विरूद्धका अभियानका कार्यक्रमहरू प्रभावकारी रूपमा सञ्चालन हुन नसकेको बताए । मुख्यमन्त्री केसीले लुम्बिनी प्रदेश सरकारले महिलाहरूमाथी हुने उत्पीडनलाई मध्यनजर गरेरै छुट्टै मन्त्रालय स्थापना गरेको बताए । ‘कतिपयले मन्त्रालय फुटाएको भनेर आलोचना गरेको पनि सुन्छु तर, महिला, वालबालिका र जेष्ठ नागरीक विशिष्टकृत हुनुपर्छ भनेर बनाइएको हो’ उनले भने । 

प्रदेश सरकारले लैंगिक हिंसा न्यूनीकरणसँगै महिलाहरूको विकासका निम्ति विभिन्न कार्यक्रम सञ्चालन गरेको समेत बताए । कार्यक्रममा आन्तरीक तथा सञ्चारमन्त्री तिलकराम शर्माले प्रविधिले समेत चुनौती थपेको बताए । उनले महिलाको समाजमा योगदान जती हुन्छ त्यसमा पुरूषहरूको निकै कम योगदान हुने बताउँदै त्यसको मूल्यांकन गर्ने गरी अभियानहरू सञ्चालन गर्नुपर्ने बताए । 

कानुन महिला, बालबालिका तथा जेष्ठ नागरीक मन्त्री रमा घर्तीले प्रदेश सरकारले महिलाहरूलाई लक्षित गरी विभिन्न कार्यक्रमहरू सञ्चालनमा ल्याएको बताईन । उनले महिलाहरूमाथि हुने हिंसा न्यूनीकरणका लागि विभिन्न संघ संस्थासँग सहकार्य गर्नेदेखि लिएर विभिन्न कार्यक्रमहरू सञ्चालन गरेको बताए । उनले महिलाहरूलाई आत्मनिर्भर बनाउने कार्यक्रमलाई जोड दिएको बताए ।

लैंगिक हिंसा विरूद्धको १६ दिने अभियान ३ सय ६५ दिन नै सञ्चालन गर्नुपर्ने मन्त्री घर्तीले बताईन । उक्त अवसरमा प्रमुख सचिव डिल्लीराज शर्मा, कानुन महिला, बालबालिका तथा जेष्ठ नागरीक मन्त्रालयका सचिव राजेन्द्र थापा, गैरसरकारी संस्था महासंघका केन्द्रीय उपाध्यक्ष सुमित्रा शर्मा, यूएनएफपीओका प्रतिनिधि राम थापा, मन्त्रालयका महाशाखा प्रमुख शारदा बस्याल लगायले बोल्दै लैंगिक हिंसा अन्त्यका लागि सामूहिक प्रतिबद्धताको खाँचो औल्याएका थिए ।

सरकारले संघसंस्थासँग सहकार्य गरेर १६ दिनसम्म विभिन्न कार्यक्रमहरू सञ्चालन गरेको कानुन अधिकृत सीता घिमिरेले जानकारी दिइन् ।  प्रत्येक वर्ष २५ नोभेम्बरदेखि १० डिसेम्बरसम्म लैंगिक हिंसा विरूद्धको १६ दिने अभियान सञ्चालन गरीन्छ ।