स्रोत नखुलेको नौ लाखसहित भारतीय युवक पक्राउ

महोत्तरी - स्रोत नखुलेको नौ लाख रूपैयाँसहित एक भारतीय युवक पक्राउ परेका छन् । पक्राउ पर्नेमा भारतको बिहार राज्यको मधुबनीको मधवापुर ग्रामपञ्चायत-१ बस्ने २४ वर्षीय अभिनव पूर्वे रहेकाे सशस्त्र प्रहरी बल बोर्डर आउट पोष्ट मटिहानीले जनाएकाे छ ।

महोत्तरीकाे मटिहानी नगरपालिका-८ स्थित नेपाल-भारत सीमानजिकै शुक्रबार सशस्त्र प्रहरी बल बोर्डर आउटपोष्ट मटिहानीकाे टाेलीले उनलाई पक्राउ गरेकाे हाे ।नम्बर नखुलेको स्कुटरमा भारतबाट नेपालतर्फ आउँदै गरेको युवक अभिनवलाई सीमामा खटिएका सशस्त्र प्रहरीले शंका लागि जाँच गर्दा उनको साथबाट स्रोत नखुलेको नौ लाख रूपैयाँ बरामद भएको हाे ।

---

पाँच सय र एक हजारका नोट मिलाएर जम्मा नौ लाख रूपैयाँसहित पक्राउ परेका उनलाई आवश्यक अनुसन्धानका लागि सशस्त्र प्रहरी बल नेपाल ९ नम्बर हेडक्वार्टर जलसागर महोत्तरीमा ल्याइएकाे प्रहरीले जानकारी दिएकाे छ । -रासस