एक क्विन्टल गाँजासहित तीन जना पक्राउ

महोत्तरी - महोत्तरीको एकडारा गाउँपालिका-५ स्थित बहेडा गाउँबाट एक क्विन्टल गाँजासहित तीन जना पक्राउ परेका छन् । पक्राउ पर्नेमा एकडारा गाउँपालिका-३ बस्ने ६० वर्षीय रामखेलावन मण्डल, वडा नम्बर ५ बस्ने ३६ वर्षीय रमेश पासवान र जलेश्वर नगरपालिका-७ बस्ने ५० वर्षीय सुरेश यादव रहेको सशस्त्र प्रहरी बल नेपाल २ नम्बरका सशस्त्र प्रहरी उपरीक्षक (एसपी) सुरेश सापकोटाले बताए ।

नेपालबाट भारत तस्करी गर्ने उद्देश्यले शुक्रबार मध्यरातमा एकडारा गापा-५ स्थित एक घरमा सात पोकामा एक क्विन्टल गाँजा प्याकिङ गरिरहेको अवस्थामा तीनै जनालाई गाँजासहित पक्राउ गरिएको सशस्त्र प्रहरी बल नेपाल-२ नम्बर छिन्नमस्ता बाहिनीपति (डीआइजी) गणेश थापामगरले जानकारी दिए । पक्राउ परेका तीनै जनालाई आवश्यक कारबाहीका लागि जिल्ला प्रहरी कार्यालयमा बुझाइएको छ ।
 

---