चोरी पैठारीकाे लत्ताकपडा सशस्त्र प्रहरीद्वारा बरामद

काठमाडौँ - पर्सा जिल्लाको वीरगञ्ज महानगरपालिका १६ इनर्वास्थित सीमा इलाकाबाट चोरी पैठारीको करिब १ लाख ६८ हजार रूपैयाँ बराबरको लत्ताकपडा  मंसीर १९ गते सशस्त्र प्रहरीले बरामद गरेको छ ।

भारतबाट अबैध रूपले २ वटा मोटरसाइकलमा राखेर ल्याउँदै गरेको उक्त लत्ताकपडा सशस्त्र प्रहरी बल नेपाल नम्बर १३ गण पर्साबाट सशस्त्र प्रहरी नायव उपरीक्षक सुमन थापाको कमान्डमा खटिएको टोलीले बरामद गरेको हो ।

---

त्यसबेला उक्त दुई वटै मोटरसाईकलसमेत बरामद गरिएको छ । बरामद मोटरसाइकलको भन्सार दाखिला मुल्य २ लाख ३५ हजार रूपैयाँ रहेको छ । यसैगरी सशस्त्र प्रहरी बल नेपाल बोर्डर आउट पोष्ट रानीबाट सशस्त्र प्रहरी निरीक्षक प्रभात कुमार गौतमको कमान्डमा खटिएको टोलीले मंसिर १९ गते करिब १ लाख ४६ हजार रूपैयाँ बराबरको चोरीपैठारीको इलेक्ट्रोनिक समान बरामद गरेको छ ।

भारतबाट अबैध रूपले नेपालतर्फ ल्याउँदै गरेको उक्त सामान सशस्त्र प्रहरीले मोरङ जिल्लाको बिराटनगर महानगरपालिका १६ स्थित सीमा इलाकाबाट बरामद गरेको हो । बरामद सामान स्थानीय भन्सार कार्यालयमा बुझाइएको छ ।